У Рыме ў ноч Хэлаўіна беларуска з кіркай спрабавала трапіць у чужую кватэру
П’яную беларуску выставілі з гасцей у Рыме. Яна вярнулася з кіркай. Карабінеры спынялі яе электрашокерам.
Фота: vecteezy.com
У ноч на Хэлаўін 36‑гадовая беларуска пасварылася з мужчынамі, у якіх бавіла вечар і ад якіх ніяк не хацела пайсці. Калі яе ўсё ж вывелі за дзверы, яна знайшла кірку, піша RomaToday.
Увечары 31 кастрычніка беларуска была ў кватэры ў рымскім раёне Трула. Там жылі пажылы мужчына і 65‑гадовы грамадзянін Румыніі, які даглядаў італьянца.
Спачатку ўсе прыемна бавілі вечар, але ўначы пасварыліся. Праз што, не ўдакладняецца. Жанчыну папрасілі сысці. Тая адмовілася, аднак урэшце мужчынам удалося вывесці яе з кватэры.
Далёка беларуска не пайшла. Недзе знайшла кірку і вырашыла трапіць назад: пачала біць па акне, вазонах, пагражала жыхарам. Паводле выдання, жанчына была моцна п’яная.
На шум адрэагавалі суседзі. Хтосьці патэлефанаваў на 112, і да дома прыехалі карабінеры.
Але нават тады жанчына не супакоілася. Карабінеры ў выніку ўключылі электрашокер — ён засвяціўся і падаў гук. Толькі пасля гэтага жанчына спынілася, і ў яе змаглі забраць кірку.
Жанчыну затрымалі і пакінулі ў камеры чакаць суда.