МНС назвала нечаканыя крыніцы радыяцыі ў паўсядзённым жыцці
Бананы, арэхі і пералёты.
Фота: LookByMedia
МНС Беларусі апублікавала нечаканы спіс таго, дзе чалавек можа сутыкнуцца з радыяцыяй — фонавае выпраменьванне атачае нас пастаянна.
Бананы. Яны ўтрымліваюць калій, невялікая частка якога — радыеактыўны ізатоп калій-40. Для нагляднага параўнання малых доз выкарыстоўваюць жартаўлівае паняцце «бананавы эквівалент», піша МНС.
Бразільскія арэхі. Акрамя калію, яны назапашваюць радый з глебы. МНС сцвярджае, што доза выпраменьвання ў іх у тысячу разоў вышэйшая, чым у іншых арэхах.
Цыгарэтны дым. Тытунь утрымлівае палоній-210 і свінец-210. Яны трапляюць на расліны з глебы, паветра і ўгнаенняў, а пры курэнні — у лёгкія.
Граніт і нью-ёркскі вакзал Гранд-Сэнтрал. МНС прыводзіць вакзал як прыклад будынка, дзе граніт стварае падвышаны фон. Гэтая парода можа змяшчаць уран, торый і калій.
Высакагорныя гарады. Чым вышэй чалавек знаходзіцца, тым меншы слой атмасферы абараняе яго ад касмічнага выпраменьвання. Напрыклад, у Дэнверы доза менавіта касмічнага выпраменьвання прыкладна ўдвая вышэйшая, чым на ўзроўні мора.
Палёты на самалёце. На вялікай вышыні ўздзеянне касмічнага выпраменьвання мацнейшае. МНС параўнала пералёт з Лондана ў Нью-Ёрк з адной флюараграфіяй.