Беларускую дэлегацыю абакралі на юнацкай Алімпіядзе, што ўпершыню праходзіць у Афрыцы
Падазраванага знайшлі ў міністэрстве.
Беларуская дэлегацыя, якая прыехала на юнацкія Алімпійскія гульні ў Сенегал, засталася без фотаапарата Nikon Z9 з аб’ектывам, піша сенегальскае выданне SeneNews.
Здарэнне адбылося ў гатэлі Pullman у Дакары, дзе спыніліся прадстаўнікі беларускай дэлегацыі. 2 лістапада яны звярнуліся ў паліцыю і паведамілі пра крадзеж.
Паводле выдання, камеры назірання зафіксавалі, як на паркоўку гатэля прыехаў мужчына на Toyota Land Cruiser. Ён скарыстаўся няўважлівасцю ахоўнікаў, узламаў памяшканне для захоўвання рэчаў і забраў фотаапарат.
Пошукі прывялі паліцэйскіх у Міністэрства аховы здароўя і грамадскай гігіены Сенегала. Там затрымалі кіроўцу, якога падазраюць у крадзяжы.
Падчас допыту ён назваў чалавека, якому, паводле следства, перадаў скрадзенае. Другога падазраванага знайшлі на мясцовым рынку. Як удакладняе Seneweb, фотаапарат выявілі ў ягонай краме.
IV летнія юнацкія Алімпійскія гульні праходзяць у Сенегале з 31 кастрычніка да 13 лістапада — упершыню алімпійскія спаборніцтвы прымае Афрыка. Беларусь прадстаўляюць сямёра спартсменаў у шасці відах спорту.