«Ён можа актывізаваць свае кантакты з Пуціным». Эксперты ацанілі наступствы паразы Трампа для Украіны і Еўропы
Параза рэспубліканцаў на прамежкавых выбарах у Кангрэс ЗША можа паўплываць на амерыканскую палітыку ў дачыненні да Ізраіля і Ірана, аднак не абавязкова прывядзе да змены курсу Вашынгтона адносна Украіны.
Дональд Трамп. Фота: Andrew Harnik / Getty Images
Як адзначаюць эксперты, апытаныя Bild, нягледзячы на тое, што дэмакраты атрымалі большасць у абедзвюх палатах Кангрэса, прэзідэнт Дональд Трамп захоўвае значныя паўнамоцтвы ў знешняй палітыцы.
На думку эксперта па Блізкім Усходзе Сімона Фукса, дэмакраты могуць узмацніць кантроль за дзеяннямі адміністрацыі ў вайне супраць Ірана і ўзняць пытанне пра амерыканскія санкцыі ў сувязі з палітыкай Ізраіля ў сектары Газа і на Заходнім беразе ракі Іардан.
У Тэгеране вынікі выбараў сустрэлі станоўча. Старшыня іранскага парламента Махамад-Багер Калібаф заявіў, што «амерыканцы сказалі вайне «не»».
Між тым эксперты па Украіне не чакаюць істотных зменаў у амерыканскай палітыцы. Спецыяліст па бяспецы Ніка Ланге нават дапускае, што Трамп «можа актывізаваць кантакты з Уладзімірам Пуціным».
Параза рэспубліканцаў таксама не абавязкова абмяжуе знешнепалітычныя магчымасці Трампа. Паводле слоў палітолага Карла Масалы, Трамп не стаў слабейшым у знешняй палітыцы, таму «не варта разлічваць на яго большую гатоўнасць да кампрамісаў».
Эксперт па ЗША Томас Егер лічыць, што амерыканскі прэзідэнт, наадварот, цяпер можа «яшчэ больш агрэсіўна прасоўваць свае інтарэсы».