Арт-менеджара Алега Ларычава судзяць за прыналежнасць да «Вейшнорыі»
У зняволенні ў яго абвастрыліся праблемы са здароўем.
Суд над Алегам Ларычавым пачаўся нядаўна. Яго абвінавачваюць паводле двух артыкулаў Крымінальнага кодэкса — 361‑1 («Стварэнне экстрэмісцкага фармавання або ўдзел у ім») і 361‑2 («Фінансаванне экстрэмісцкага фарміравання»), паведаміла Радыё Свабодзе Аліна Герашчанка.
Пракуратура імкнецца даказаць, што Алег Ларычаў мае дачыненне да культурніцкай суполкі «Да зораў», якая спрабавала афіцыйна арганізоўваць у Беларусі культурныя падзеі кшталту імпрэз і канцэртаў і мела замежнае фінансаванне.
Таксама Ларычава абвінавачваюць у датычнасці да старой мэмнай ініцыятывы «Вейшнорыя». Неісная дзяржава Вейшнорыя ўпершыню з'явілася ў сцэнары сумесных вайсковых вучэнняў Расіі і Беларусі «Захад-2017». Мем спадабаўся карыстальнікам сеціва, і Вейшнорыя стала мемам. У сеціве людзі прыдумлялі герб і сцяг няіснай дзяржавы, з'явіўся жартоўны сайт. Увесь гэты рух быў гумарыстычным і фактычна спыніўся 6—7 гадоў таму.
У верасні інфармацыю пра тое, што Ларычава абвінавачваюць у дачыненні да суполкі «Да зораў», пацвердзіў Радыё Свабодзе вызвалены музыка Алесь Чумакоў. Са слоў Чумакова, спачатку яны з Ларычавым былі фігурантамі адной справы, аднак пазней справы раздзялілі. Алега прывозілі ў суд над Чумаковым у якасці сведкі ў жніўні 2026 года. Са слоў музыкі, Ларычаў ужо тады адчуваў сябе дрэнна.
Разам з Алегам Ларычавым судзяць Сямёна Малашэнкава, якога таксама затрымалі ў мінулым лістападзе і абвінавачваюць у дачыненні да ініцыятывы «Да зораў». Алега ўтрымліваюць у СІЗА-1 у Калядзічах пад Мінскам.
На працэсе Алег Ларычаў спрабаваў заявіць Алеся Чумакова ў якасці сведкі, але той ужо быў за мяжой.
17 снежня 2025 года ініцыятыву «Да зораў» прызналі «экстрэмісцкім фармаваннем». Няісную Вейшнорыю і сацыяльныя сеткі жартоўнага праекта прызналі «экстрэмісцкім фармаваннем» сёлета ў сакавіку.