Памёр доктар Уладзімір Бялуга
У Гродне на 76‑м годзе жыцця раптоўна памёр вядомы доктар, кандыдат медыцынскіх навук, дацэнт кафедры акушэрства і гінекалогіі Гродзенскага дзяржаўнага медыцынскага ўніверсітэта Уладзімір Бялуга. У ліпені 2026 года яму споўнілася 75 гадоў.
Уладзімір Бялуга
Ва ўніверсітэце адзначылі, што Уладзімір Бялуга быў спецыялістам, чыя прысутнасць надавала ўпэўненасці калегам і давала надзею пацыентам. Бялуга браўся за самыя складаныя выпадкі.
Усё сваё прафесійнае жыццё ён прысвяціў акушэрству і гінекалогіі. Пацыенткі звярталіся да яго не толькі як да высокакваліфікаванага спецыяліста ў галіне ультрагукавой дыягностыкі, але і як да чалавека, які ўмее выслухаць, суцешыць і праявіць шчыры клопат.
Ва ўніверсітэце згадваюць яго як таленавітага доктара, навукоўца і педагога, а таксама як добрага, надзейнага і шчырага чалавека з выдатным пачуццём гумару.
Развітанне з Уладзімірам Бялугам адбудзецца 7 лістапада ў Гродне, у капліцы пры храме святой прападобнай Марфы.
Чытайце таксама:
У 45 гадоў памёр вядомы гомельскі прапагандыст Станіслаў Галкоўскі
У палітзняволенай журналісткі Вольгі Радзівонавай памерла мама