Грэцкі падтрымаў адмову Канады выдаваць візы расійскім хакеістам
«Думаю, многія гульцы і жыхары Канады лічаць гэтак жа», — сказаў Грэцкі.
Уэйн Грэцкі, фота Wikimedia Commons
Легендарны хакеіст з беларускімі каранямі, найлепшы бамбардзір у гісторыі НХЛ Уэйн Грэцкі падтрымаў рашэнне прэм’ер-міністра Канады Марка Карні адмовіць у візах расійскім спартсменам для ўдзелу ў моладзевым чэмпіянаце свету. Ягоныя словы прыводзіць TSN.
Спартыўны арбітражны суд (CAS) 30 кастрычніка абавязаў Міжнародную федэрацыю хакея (IIHF) дапусціць расійскія зборныя да міжнародных турніраў.
Бліжэйшае спаборніцтва — моладзевы чэмпіянат свету — адбудзецца ў Канадзе, у гарадах Эдмантан і Рэд-Дзір, у снежні 2026 года — студзені 2027-га.
Карні заявіў, што расіянам адназначна адмовяць у візах для ўдзелу ў гэтым турніры.
«Малайчына. Ён заняў такую пазіцыю і выразна яе абазначыў. Думаю, многія гульцы і жыхары Канады лічаць гэтак жа», — сказаў Грэцкі.
IIHF пакуль не вырашыла, як будзе ажыццяўляцца допуск расіян да міжнародных турніраў.