Абвешчаны пераможца прэміі Гедройця. Але сапраўдную назву кнігі ведаюць толькі сябры журы

7 лістапада ў Еўрапейскім цэнтры салідарнасці ў Гданьску былі абвешчаныя пераможцы 15‑й літаратурнай прэміі імя Ежы Гедройця. Журы прысудзіла першае і другое месцы творам, якія ўдзельнічалі ў конкурсе ў зашыфраваным выглядзе, піша Беларускі ПЭН.

Здымак ілюстрацыйны. Фота: vecteezy.com

Сапраўдныя імёны аўтараў і назвы гэтых кніг пакуль што не абвяшчаюцца публічна з меркаванняў бяспекі. 

Першае месца атрымала кніга, аўтару якой давялося прыдумаць для ўдзелу псеўданім Аляксандр Касцюковіч і назву-маску «Лірнік». Журы ўганаравала кнігу «за высокае майстэрства валодання словам і глыбокую эмпатыю».

Другое месца здабыла кніга з назвай-маскай «Цесля жыцця», аўтар якой удзельнічаў пад псеўданімам Сяргей Дубаўцэвіч. Кніга ўганараваная «за сінтэз дакументальнага і мастацкага і плённае развіццё беларускай даследчыцкай прозы».

І толькі трэція кніга і аўтар публічныя. Трэцюю прэмію атрымаў раман «Пентаквантар» (кнігі 1 і 2) Арцёма Шуканава — «за яскравую мультыкультурную навукова-фантастычную сагу, якая пашырае жанравыя межы беларускай літаратуры».

Прэмія імя Ежы Гедройця прысуджаецца з 2012 года і лічыцца найважнейшай незалежнай літаратурнай узнагародай Беларусі. Яе арганізатары — Беларускі ПЭН і Міжнародны саюз беларускіх пісьменнікаў.

Каментары да артыкула