«Вокны з чорным налётам не адмыць». Пінчукі скардзяцца на адходы «Пінскдрэва»
У «Пінскдрэва» ўзніклі праблемы з прыродаахоўнай службай, піша BG.Media.
Фота: pinskdrev.by
У чым прэтэнзіі да «Пінскдрэва»?
Прадстаўнікі холдынгавай кампаніі «Пінскдрэў» звярнуліся па дапамогу да старшыні Пастаяннай камісіі Савета Рэспублікі Міхаіла Русага падчас асабістага прыёму грамадзян у Пінскім горадвыканкаме. Нагодай сталі прэтэнзіі з боку прыродаахоўнай службы і падатковай інспекцыі.
Як распавялі ў сюжэце «ТБ Пінск», спрэчка ўзнікла праз перапрацоўку драўняных адходаў. Правяраючыя ўгледзелі праблему ў тым, што сярод астаткаў драўніны могуць знаходзіцца хімічна апрацаваныя матэрыялы. А гэта азначае, што абыходзіцца з імі як са звычайнай сыравінай для вытворчасці паліва немагчыма.
Для прадпрыемства гэта абярнулася сур'ёзнымі фінансавымі стратамі. Прадстаўнікі «Пінскдрэва» папрасілі разабрацца ў сітуацыі.
Міхаіл Русы пагадзіўся, што да хімічна апрацаваных драўняных астаткаў мусіць прымяняцца асаблівы парадак. Аднак ён звярнуў увагу і на іншы бок пытання: нельга дапускаць, каб праз спрэчную класіфікацыю матэрыялаў пакутавала сама вытворчасць.
У якасці магчымага рашэння Міхаіл Русы прапанаваў вывучыць вопыт прадпрыемства ў парку «Ляскавічы», дзе, паводле яго слоў, ужо ўдалося ўрэгуляваць аналагічную сітуацыю.
Пінчукі скардзяцца на паветра і чорны налёт
У каментарах пад навіной жыхары Пінска загаварылі не толькі пра дакументы і вытворчыя страты. Многія ўспомнілі пра якасць паветра ў горадзе і ўласныя бытавыя праблемы. Некаторыя карыстальнікі сцвярджаюць, што ў асобных раёнах Пінска цяжка дыхаць, а на вокнах і паверхнях з'яўляецца цёмны налёт.
«Хай пад'едуць у раён вопытна-механічнага завода ўвечары — дыхаць немагчыма», «А наш дом пад нумарам 47 дыхае кожны дзень, а вокны з чорным налётам не адмыць», — пішуць гараджане.
Некаторыя лічаць, што пры выяўленні экалагічных парушэнняў прадпрыемства мусіць несці адказнасць, незалежна ад яго эканамічнага становішча.
Іншыя каментатары заклікалі звярнуць увагу на агульны стан экалогіі ў горадзе.