У Аўстрыі нашэсце тарантулаў
Чаму людзі сталі сустракаць іх часцей?
Паўднёварускі тарантул. Фота: commons.wikimedia.org / Сяргей Маркаў
У Аўстрыі з пачатку верасня на платформе грамадзянскай навукі naturbeobachtung.at паведамілі пра больш чым 200 сустрэч з двума відамі тарантулаў. 175 з іх эксперты ўжо змаглі пацвердзіць, піша «Еўраньюс».
Больш за ўсё тарантулаў з пачатку верасня бачылі ў Штырыі. З 66 выпадкамі назіранняў другая па плошчы федэральная зямля апярэджвае Ніжнюю Аўстрыю (49) і Бургенланд (43).
У Штырыі і Карынтыі да гэтага часу фіксавалі выключна чорнабрухага тарантула, з Вены і Ніжняй Аўстрыі паступалі толькі паведамленні пра паўднёварускага тарантула. У Бургенландзе ж былі выяўленыя абодва віды.
Асабліва часта гэтых павукоў можна ўбачыць увосені. У пошуках абароненага ад марозу зімовага прытулку яны часам забіраюцца і ў кватэры, дамы або гаражы. У прыродзе яны аддаюць перавагу ўкрыццям, напрыклад норам у зямлі і трэшчынам у скалах.
У Аўстрыі галоўным чынам сустракаюцца два мясцовыя віды тарантулаў: паўднёварускі тарантул і чорнабрухі тарантул. Абодва віды адносяцца да воўчых павукоў і пры адчуванні пагрозы могуць укусіць, аднак гэта здараецца вельмі рэдка, напрыклад калі іх чапаюць або моцна турбуюць.
Укус можа быць балючым і выклікаць пачырваненне ці пухліну. Для здаровых людзей ён, як правіла, не ўяўляе небяспекі.
Паводле даных Аўстрыйскага прыродаахоўнага аб'яднання, паўднёварускага тарантула ўжо ў пачатку 1920‑х гадоў фіксавалі ў раёне возера Нойзідлер-Зе і ў Вене. Чорнабрухі тарантул быў упершыню задакументаваны ў 1970‑х гадах у Штырыі.
З таго часу з'явіліся пацверджанні і з іншых рэгіёнаў. У 2024 годзе паўднёварускага тарантула ўпершыню задакументавалі ў Штырыі.
Навуковае даследаванне 2025 года таксама паказвае, што тарантулы пасля шматгадовага скарачэння колькасці зноў распаўсюджваюцца і ў Чэхіі. Даследчыкі лічаць важным фактарам больш цёплыя і сухія летнія сезоны.