Адной з мэтаў званка Стуба і Сцёрэ Пуціну была ацэнка псіхалагічнага стану расійскага прэзідэнта
«Ён цалкам выразна выклаў свае аргументы», — удакладніў Сцёрэ.
Уладзімір Пуцін. Фота: Ramil Sitdikov / Pool Photo via AP
Адной з прычын званка прэзідэнта Фінляндыі Аляксандра Стуба і прэм’ер-міністра Нарвегіі Ёнаса Гара Сцёрэ Уладзіміру Пуціну 27 кастрычніка было жаданне ацаніць яго псіхалагічны стан (state of mind). Пра гэта ў панядзелак паведаміла Politico, піша «Агенцтва».
Ацэньваючы расійскага лідара пасля размовы, Сцёрэ ахарактарызаваў яго паводзіны як «рацыянальныя» і «прафесійныя».
«Ён цалкам выразна выклаў свае аргументы», — удакладніў Сцёрэ.
Выданне аднавіла закулісную гісторыю тэлефоннай размовы і падрыхтоўкі да яе на падставе гутарак з палітыкамі, дыпламатамі і чыноўнікамі.
Стуб і Сцёрэ вырашылі ўмяшацца ў перамоўны працэс па Украіне, асцерагаючыся яго зрыву на фоне крытыкі Дональдам Трампам Уладзіміра Зяленскага і адначасовых заяваў пра тое, што расійскі бок паводзіў сябе «нармальна», гаворыцца ў публікацыі.
Прэзідэнт Фінляндыі і прэм’ер-міністр Нарвегіі, якія знаёмыя шмат гадоў і цесна супрацоўнічалі ў пытаннях Расіі на пасадах кіраўнікоў МЗС сваіх краін, некалькі месяцаў без лішняй агалоскі вывучалі магчымасць сумеснага званка ў Крэмль, піша Politico. Паводле звестак выдання, Стуб і Сцёрэ прыйшлі да высновы, што вельмі важна надаць новы імпульс дыпламатычнаму працэсу перад аднаўленнем перамоў у Абу-Дабі.
Кіраўніцтва Францыі, Германіі і ЗША, а таксама іншыя еўрапейскія лідары, у тым ліку прэм’ер-міністарка Даніі Метэ Фрэдэрыксен, былі загадзя праінфармаваныя пра будучую размову, паведамілі чыноўнікі, знаёмыя з яе падрыхтоўкай.
Прадстаўнікі Фінляндыі і Нарвегіі звязаліся з акружэннем Пуціна і ўзгаднілі парадак размовы, гаворыцца ў публікацыі. Кожны з бакоў павінен быў па чарзе выкласці загадзя падрыхтаваныя тэзісы, не перабіваючы суразмоўцаў.
Перад званком Стуб і Сцёрэ падрабязна абмеркавалі з Зяленскім, якія пазіцыі варта данесці да Пуціна, а пасля размовы праінфармавалі ўкраінскага прэзідэнта пра яе змест.
Падчас размовы, паводле некаторых сведчанняў, Пуцін падзяліўся са Стубам і Сцёрэ сваёй глыбокай цікавасцю да расійскага мінулага, прачытаўшы ім лекцыю пра гісторыю славян і вытокі вайны ва Украіне, піша Politico. Першай пра гэта паведаміла Financial Times. Аднак Стуб і Сцёрэ абвяргалі гэтыя звесткі. Прэм’ер-міністр Нарвегіі заявіў Politico: «Нічога падобнага ён не рабіў».
Адзін высокапастаўлены чыноўнік, знаёмы з абставінамі размовы, паведаміў Politico, што Стуб і Сцёрэ цярпліва слухалі расійскага прэзідэнта на працягу 90‑хвіліннай гутаркі. Аднак іншыя еўрапейскія чыноўнікі, праінфармаваныя пра змест званка, адмаўлялі, што Пуцін чытаў суразмоўцам гістарычную лекцыю. Яны выказалі здагадку, што падобныя сцвярджэнні з’яўляюцца часткай расійскай інфармацыйнай кампаніі, накіраванай на прыніжэнне еўрапейцаў.
Выслухаўшы аргументы Пуціна, якія, як адзначыў нарвежскі прэм’ер, «даўно вядомыя», Стуб і Сцёрэ перадалі яму пазіцыю Зяленскага: тэрытарыяльныя межы можна абмяркоўваць толькі на ўзроўні кіраўнікоў дзяржаў, падчас асабістай сустрэчы, а перад гэтым неабходна прыняць меры для дээскалацыі. Затым прэзідэнт Фінляндыі і прэм’ер-міністр Нарвегіі перайшлі да пытанняў бяспекі ў Балтыйскім моры і неабходнасці захоўваць гэты марскі шлях адкрытым для гандлю, піша Politico.
Пуцін сур’ёзна паставіўся да ідэі перамоў у Абу-Дабі і паведаміў Стубу і Сцёрэ, што даручыць сваім перамоўшчыкам падрыхтавацца да сустрэчы, каб высветліць, ці ўдасца дасягнуць прагрэсу, піша Politico.
«Сам факт, што ён адказвае на званок і што ў нас ёсць іншыя спосабы звязацца з ім, на маю думку, як мінімум сведчыць пра гатоўнасць сесці за стол перамоў», — адзначыў Сцёрэ.
Аднак гэтая размова не пераканала нарвежскага прэм’ер-міністра ў тым, што Пуцін сапраўды гатовы да ўрэгулявання канфлікту.