Беларуса, якога затрымалі ў Грузіі з пратэрмінаванымі дакументамі, арыштавалі на тры месяцы
Грамадзяніна Беларусі, затрыманага ў Тбілісі з пратэрмінаванымі дакументамі, гарадскі суд грузінскай сталіцы 9 лістапада арыштаваў на тры месяцы. Пра гэта паведаміў праваабаронца Раман Кісляк, піша выданне «Позірк».
Здымак ілюстрацыйны. Фота: vecteezy.com
Беларуса затрымалі 6 лістапада ў Тбіліскім метро. Паводле назіранняў чытачоў выдання «Позірк», сёлета групы паліцэйскіх дзяжураць каля найбольш загружаных станцый і час ад часу правяраюць дакументы ў людзей, якія здаюцца ім замежнікамі. Патрульныя таксама атрымалі паўнамоцтвы правяраць законнасць знаходжання іншаземцаў у Грузіі.
У затрыманага скончыліся тэрміны дзеяння беларускага пашпарта і грузінскай часовай ID-карткі. На судовым пасяджэнні прысутнічалі грузінскія праваабаронцы, але суд не прыняў аргументы адваката і пастанавіў узяць беларуса пад варту. На абскарджанне гэтага рашэння ў апеляцыйным парадку адведзена пяць дзён. Пасля гэтага павінен адбыцца судовы разгляд справы аб дэпартацыі.
Раман Кісляк не змог прысутнічаць на пасяджэнні, бо апошнія месяцы яго ўжо чацвёрты раз не пускаюць у суд без дзейнага дакумента. Сам праваабаронца некалькі гадоў дамагаецца атрымання прытулку ў Грузіі і цяпер знаходзіцца пад часовай абаронай Камітэта ААН па правах чалавека, які разглядае яго скаргу на адмову.
Паводле інфармацыі Кісляка, затрыманы жывы і здаровы, яго бачылі ў судзе і ён меў магчымасць выказацца. Аднак праваабаронца звярнуў увагу на тое, што пасяджэнні аб арыштах праходзілі вельмі хутка: суддзя прыспешваў удзельнікаў, а прадстаўніца Дэпартамента міграцыі МУС Грузіі гаварыла настолькі хутка, што нават грузінскія праваабаронцы не ўсё паспявалі пачуць. У сувязі з гэтым была пададзена скарга на тое, што ў гэтай частцы працэс не быў адкрытым.
Цяпер, па словах Кісляка, неабходна дамагчыся прызнання дэпартацыі недапушчальнай. Ён назваў цяперашнюю працу грузінскай судовай сістэмы прадказальнай і заявіў, што затрыманні і арышты дзеля наступнай дэпартацыі фактычна пастаўленыя на паток. Калі апеляцыя не дапаможа, праваабаронцы маюць намер звярнуцца ў Камітэт ААН супраць катаванняў або Камітэт ААН па правах чалавека. Яны разлічваюць дамагчыся часовых ахоўных мераў і забароны на дэпартацыю беларуса.
Па словах Кісляка, на радзіме супраць затрыманага вядзецца палітычна матываваны пераслед. На гэтай падставе ён прасіў прытулку ў Грузіі, але атрымаў адмову і ад Дэпартамента міграцыі, і ад гарадскога, і ад апеляцыйнага судоў.
Паколькі ў арыштаванага няма дзейных дакументаў, дэпартаваць яго могуць толькі ў Беларусь. Ці пагодзіцца прыняць яго якая-небудзь трэцяя краіна, напрыклад, Арменія, пакуль невядома. Кісляк адзначыў, што раней не сустракаўся з выпадкамі, калі чалавеку, якому пагражае дэпартацыя, даводзілася вырашаць такую праблему праз пратэрмінаваныя дакументы.