У Германіі ў 16‑гадовага падлетка канфіскавалі мадыфікаваны электрасамакат, здольны разганяцца да 127 км/г
Маладыя людзі паспрабавалі ўцячы, але аднаго з іх затрымалі.
Фота: тг-канал Bild
Паліцыя нямецкага горада Ізерлон у федэральнай зямлі Паўночны Рэйн — Вестфалія заўважыла ў 16‑гадовага падлетка мадыфікаваны электрасамакат, які на выпрабавальным стэндзе разагнаўся да 127 км/г, піша Bild.
Інцыдэнт адбыўся ўвечары 31 кастрычніка. Паліцыянты заўважылі групу падлеткаў на электрасамакатах і вырашылі праверыць транспартныя сродкі. Маладыя людзі паспрабавалі ўцячы, але аднаго з іх затрымалі.
Яго самакат канфіскавалі і накіравалі на тэхнічную экспертызу. У паліцыі ўдакладнілі, што 127 км/г — гэта тэарэтычная максімальная хуткасць, дасягнутая без кіроўцы.
Супраць падлетка распачалі справу за кіраванне транспартным сродкам без пасведчання кіроўцы. Яго бацькоў таксама правяраюць на дачыненне да допуску мадыфікаванага самаката да эксплуатацыі.