Махляры пачалі дурыць людзей лістамі на афіцыйных бланках

Ашуканцы прыдумалі новую схему падману з выкарыстаннем звычайных папяровых лістоў. Пра гэта паведаміў намеснік начальніка ўпраўлення крымінальнага вышуку УУС Гомельскага аблвыканкама Вадзім Барсук.

Здымак ілюстрацыйны. Фота з сацсетак

Паводле інфармацыі сілавікоў, спачатку чалавек знаходзіць у сваёй паштовай скрынцы ліст на нібыта афіцыйным бланку — з гербам, подпісамі і пячаткамі. Праз некалькі дзён на электронную пошту яму прыходзіць паведамленне з такім самым тэкстам, але ўжо са спасылкай. Яна вядзе на падробку афіцыйнага сэрвісу.

Калі карыстальнік уводзіць на такім сайце лагін і пароль, гэтыя звесткі трапляюць да махляроў. У міліцыі адзначаюць, што папяровы ліст стварае ўражанне надзейнасці, а электроннае паведамленне павінна канчаткова пераканаць чалавека. Схема разлічаная найперш на тых, хто не давярае лічбавым паведамленням, але верыць звычайнай пошце.

Вадзім Барсук папярэдзіў, што пераходзіць па спасылцы з такога ліста нельга. У выніку можна страціць персанальныя звесткі, лагін і пароль ад уліковага запісу, а таксама заразіць прыладу шкоднаснай праграмай.

У міліцыі раяць правяраць любыя паведамленні незалежна ад таго, у якой форме яны атрыманыя. Перад рэгістрацыяй на сайце трэба ўважліва паглядзець на яго назву ў адрасным радку і карыстацца толькі праверанымі рэсурсамі.

Каментары да артыкула