Беларусь не апавяшчае грамадзян аб пралётах дронаў, але перадае інфармацыю пра гэта суседнім краінам. Тыя апавяшчаюць яшчэ на падлёце
10 лістапада Літва папярэдзіла грамадзян пра «магчымую паветраную небяспеку» пасля атрымання інфармацыі ад Мінска. У Беларусі насельніцтву нічога не паведамлялася, а СМІ не даюць ніякай інфармацыі аб пралёце дронаў.
Украінскі ўдарны беспілотнік. Скрыншот з відэа
Міністр аховы краю Літвы Робертас Каўнас паведаміў, што Беларусь у аўторак увечары папярэдзіла Літву пра рух дронаў над беларускай тэрыторыяй у кірунку Літвы.
«У 22:47 па тэхнічнай лініі з беларускага боку надышла інфармацыя пра тое, што ў бок Літвы ляцяць нераспазнаныя аб'екты, якія Беларусь спрабуе нейтралізаваць», — сказаў Робертас Каўнас тэлебачанню LRT у сераду.
Праз 10 хвілін пасля атрымання гэтай інфармацыі ўсе жыхары Вільні, Віленскай і Уцянскай акруг атрымалі апавяшчэнні пра «магчымую паветраную небяспеку (жоўты ўзровень)».
Сама трывога ў выніку не абвяшчалася, аб'екты ў выніку не заляцелі ў паветраную прастору Літвы, яны павярнулі ў бок Латвіі і Расіі. Гаворка, імаверна, ішла пра ўкраінскія беспілотнікі, збітыя з курса ўздзеяннем расійскіх сродкаў радыёэлектроннай барацьбы.
У Беларусі насельніцтва аб пралёце дронаў ніяк не апавяшчалася ні ўчора, ні падчас іншых аналагічных інцыдэнтаў.
У Польшчы, Літве і Латвіі ўжо не раз абвяшчалася паветраная трывога падчас залётаў беспілотнікаў. Сур'ёзных наступстваў гэтыя залёты пакуль ні разу не мелі: дроны пераважна падалі ў маланаселенай мясцовасці або іх збівалі над палямі і лясамі натаўскія знішчальнікі.
У ноч на 11 лістапада пазней ужо іншы дрон заляцеў на тэрыторыю Літвы, прабыў у ёй некалькі хвілін, затым заляцеў у Польшчу, пасля чаго вярнуўся ў Літву і без наступстваў скіраваўся ў Латвію.
Рэжым Аляксандра Лукашэнкі трымаецца іншай лініі, чым улады Літвы, Польшчы і Латвіі ў пытанні інфармавання насельніцтва пра патэнцыйныя пагрозы. Выглядае, што Мінск імкнецца, каб насельніцтва не пераймалася. Гэта нагадвае падыход уладаў Беларусі да кавіду на піку эпідэміі ў 2020—2021 гадах.
Пасля пачатку пандэміі каранавіруса ў Беларусі засакрэцілі звесткі пра смяротнасць, але з даных, якія здабылі «Кіберпартызаны», стала вядома, што за час пандэміі з 2020 па 2022 год залішняя смяротнасць склала звыш 90 тысяч чалавек. Гэтыя страты не маглі адбыцца ні праз што іншае, як праз COVID-19. Смяротнасць пачала ўздымацца ў сакавіку 2020 года, калі ўлады Беларусі яшчэ цалкам адмаўлялі наяўнасць пагрозы. Смяротнасць у Беларусі значна перавысіла паказчыкі ўсіх іншых краін Еўропы, гаворка ідзе пра дзясяткі тысяч загубленых жыццяў.
Хоць за распаўсюд інфармацыі жыхароў Беларусі караюць, у незалежныя СМІ прыходзіла інфармацыя пра падзенне беспілотнікаў на захадзе Мінска, а таксама, не раз, у Гомельскай вобласці. Таксама, імаверна, дронавыя ўдары былі прыцэльна нанесеныя па вышках сувязі на поўдні Беларусі.