Беларуска на «Міс Сусвет» здзівіла сваім уборам
Новая спадарожніца Лукашэнкі Алія Кароткая з’явілася на конкурсе ў чорна-белым паласатым камплекце. Убор стварыла яе мама — дызайнерка і заснавальніца брэнда Kiali. У каментарах жартуюць пра турму і патрабуюць свабоду зебрам.
Фота з інстаграма Аліі Кароткай
Беларуска ўдзельнічае ў конкурсе «Міс Сусвет», які цяпер праходзіць у Пуэрта-Рыка. Пераможцу назавуць 24 лістапада, але адзін з вобразаў Кароткай ужо выклікаў абмеркаванне ў сацсетках.
«Сёння я ў вобразе, які стварыла мая мама. А таксама 99% вобразаў, прадстаўленых мной на конкурсе, — гэта тыя, якія стварыла мая мама! Адчуваю, што яе вобразы прынясуць мне ўдачу», — напісала Кароткая ў інстаграме.
Але каментатары не ацанілі мамін касцюм:
«Свабоду зебрам у Афрыцы!»
«У духу Бітлджуса».
«Гэта касцюм для Хэлаўіна».
«Як быццам толькі што выйшла з турмы», — пішуць яны.
Асобную ўвагу прыцягнула шапачка: яе таксама параўналі з галаўным уборам зняволеных. «Міс папраўленчая ўстанова», — назвалі Кароткую.
Мама Аліі — дызайнерка Дыяна Кароткая. У 2025 годзе яна стварыла брэнд Kiali.
У маміным адзенні Алія з’яўлялася і на мерапрыемствах з удзелам Лукашэнкі — яна ўваходзіць у кола дзяўчат, якія суправаджаюць яго. Кароткая рэгулярна з’яўляецца на прыёмах і балах Лукашэнкі, падтрымлівае яго хакейную каманду.