У ЗША бацька закапаў дзіця ў пераносцы для сабак. Але яно выжыла, правёўшы пад зямлёй суткі

У амерыканскім штаце Паўднёвая Караліна знайшлі жывым 11‑месячнага хлопчыка, які правёў каля 24 гадзін пад зямлёй у пераносцы для сабак. Паводле інфармацыі паліцыі, дзіця там пакінуў ягоны бацька, паведамляе Euronews.

Коа выпісалі з бальніцы ў аўторак вечарам, 7 лістапада 2026 года. Фота: Amber Hammond

Як паведаміў агенцтву Associated Press дзядуля хлопчыка Джон Комер, дзіця па імені Коа Шарп знайшлі ў аўторак у лясістай мясцовасці на суседнім участку. Малы плакаў і быў увесь у зямлі. Неўзабаве пасля таго, як яго адкапалі, ён супакоіўся, а калі яго паклалі ў кузаў грузавіка, нават здолеў самастойна сесці.

Дзядуля расказаў, што ад радасці ўзняў рукі да неба, скакаў і дзякаваў Богу, а потым упаў на калені і заплакаў.

Шэрыф акругі Лексінгтан Джэй Кун пасля наведвання бальніцы паведаміў, што, паводле прагнозаў медыкаў, хлопчык цалкам паправіцца. Увечары ў аўторак яго выпісалі з бальніцы.

Бацьку дзіцяці, 25‑гадоваму Майклу Комеру, выставілі абвінавачанне ў замаху на забойства. З панядзелка, калі хлопчык знік, мужчына знаходзіўся пад вартай. Яго затрымалі, калі ён хаваўся ў адным з будынкаў горада Бейтсбург-Лісвіл. Судовае пасяджэнне прызначанае на чацвер. Улады пакуль не паведамляюць пра магчымыя матывы ўчынку. 

У пошуках хлопчыка ўдзельнічалі дзясяткі ратавальнікаў і супрацоўнікаў экстранных службаў. Пасля цэлага дня пошукаў яны заўважылі нядаўна перакапаную зямлю і пачулі з-пад яе дзіцячы плач. Паводле шэрыфа, выратавальнікі разумелі, што час мае вырашальнае значэнне, таму спяшаліся як мага хутчэй дастаць дзіця. Калі хлопчыка вызвалілі з пераноскі, ён, паводле слоў Куна, ледзь трымаўся за жыццё.

Шэрыф мяркуе, што выжыць дзіцяці дапамаглі прахалоднае надвор'е і паветраная прастора, якая ўтварылася дзякуючы ручніку, абгорнутаму вакол закапанай пераноскі. Стрыечная бабуля хлопчыка Эмбер Хаманд, якая назірала за выратаваннем, сказала, што сям'я адчувае палёгку, ведаючы, што Коа цяпер у бяспецы.

Паводле звестак уладаў, перад здарэннем хлопчык знаходзіўся пад наглядам маці Майкла Комера. Яна пакінула дзіця з сынам, пакуль сама адлучылася па справах і чакала прыходу іншай няні. Аднак да моманту яе прыходу Майкла ўжо не было — ён забраў Коа з сабой. Запісы камер назірання ў некалькіх мясцовых установах паказалі, што ў панядзелак пасля абеду мужчыну бачылі ўжо без дзіцяці.

Джон Комер расказаў, што ў панядзелак прыняў у сябе сына і ўнука, бо Майкл папрасіў дазволу ў яго спыніцца. Цяпер дзядуля лічыць, што сын скарыстаўся яго дабрынёй, але адначасова ўдзячны, што пагадзіўся дапамагчы: калі б яны паехалі ў іншае месца, хлопчыка маглі б не знайсці своечасова.

Паводле слоў Джона Комера, усё выглядала так, быццам яго сын загадзя спланаваў свае дзеянні і скарыстаўся зручным момантам. Калі б Майкл не апынуўся ў яго доме, сваякі нават не здагадваліся б, куды ён мог накіравацца.

Эмбер Хаманд паведаміла, што яе пляменнік раней казаў пра намер вывезці дзіця ў Нью-Ёрк, бо не хацеў жыць у адным штаце з маці хлопчыка. Калі Коа знік, сваякі спачатку меркавалі, што Майкл мог перадаць яго камусьці іншаму. Яны не маглі ўявіць, што здарыцца нешта падобнае.

Шэрыф адзначыў, што паміж бацькамі хлопчыка існавалі пэўныя праблемы, а дзеці ў такіх сітуацыях часта аказваюцца закладнікамі абставін.

Згодна з судовымі дакументамі акругі Лексінгтан, у кастрычніку Майкл Комер атрымаў умоўнае пакаранне пасля таго, як прызнаў віну ў хатнім гвалце і грубым парушэнні грамадскага парадку. Інцыдэнт адбыўся ў ліпені. У межах пагаднення са следствам абвінавачанне ў незаконным абыходжанні са зброяй знялі, а больш за два месяцы, праведзеныя пад вартай, залічылі ў тэрмін пакарання.

Эмбер Хаманд, якая даглядала Коа ў мінулыя выхадныя, расказала, што хлопчык ужо спрабаваў самастойна стаяць на нагах і вельмі любіў мультфільмы пра Мікі Маўса.

Дзядуля Коа адзначыў, што раней ніколі не чуў, каб унук плакаў. Увесь час да знікнення той быў вясёлым дзіцем і часта ўсміхаўся.

Каментары да артыкула