Маштабны збой закрануў Outlook, Teams, Copilot і іншыя сэрвісы Microsoft
Дзясяткі тысяч карыстальнікаў у свеце адчуваюць на сабе глабальны збой сэрвісаў кампаніі Microsoft, у тым ліку імэйл-кліента Outlook, сэрвісу відэаканферэнцый Teams і ШІ-чатбота Copilot, піша Бі-бі-сі.
Фота: Scott Olson/Getty Images
Усе гэтыя сэрвісы, паводле слоў карпарацыі, цярпяць ад праблем з падключэннем. Паводле цяперашняй ацэнкі Microsoft, малаверагодна, што гэтыя праблемы абумоўлены кібератакай.
Паводле звестак маніторынгавага сэрвісу Downdetector, праблемы з праграмамі Microsoft на працягу адной гадзіны былі зафіксаваныя ў 74 краінах. Яны працягваюцца дагэтуль, ужо больш чым праз восем гадзін.
Паводле звестак на сайце Microsoft, яе пакетам Microsoft 365 у свеце карыстаюцца 430 млн чалавек.
Microsoft паведаміла, што выпусціла апдэйт, але яго разгортванне займае больш часу, чым чакалася.
Кампанія паведаміла, што яе серверы адразу ў некалькіх рэгіёнах адчуваюць «павышаную нагрузку». Гэта азначае, што колькасць запытаў вышэйшая, чым серверы здольныя апрацаваць.
Сэрвісы накшталт Outlook могуць працаваць прыкметна павольней: лісты, далучаныя файлы і каляндарныя запісы могуць доўга не адкрывацца або не паказвацца ва ўваходных. Промпты ў Copilot могуць апрацоўвацца павольна або наогул не апрацоўвацца ва ўстаноўлены час.
Збой таксама закрануў некаторыя староннія сэрвісы, якія не належаць Microsoft. Кампаніі OpenAI і Anthropic паведамілі пра збоі ў сваіх прадуктах (вялікіх моўных мадэлях) у той частцы, дзе яны спалучаюцца з прадуктамі Microsoft.
Міністр унутраных спраў і кібербяспекі Аўстраліі Тоні Бёрк распавёў, што паразмаўляў з прадстаўнікамі Microsoft у сваёй краіне. Паводле яго слоў, яны «не думаюць, што маюць справу з кіберінцыдэнтам».
Некаторыя аналітыкі заявілі, што калі ніякай кібератакі не было, тады тое, што адбываецца, варта называць «неверагоднай некампетэнтнасцю», як выказаўся Пол Спейн з новазеландскай кансалтынгавай фірмы Gorilla Technology.
Кампаніі фактычна «страцілі працоўны дзень», абураецца ён.