«Прадаваць квіткі па пашпарце пакуль немагчыма». У Тэатры лялек пракаментавалі ажыятаж на квіткі
Квіткі на самыя гучныя пастаноўкі Яўгена Карняга разлятаюцца хутчэй, чым на канцэрты сусветных суперзорак. Але як ухапіць запаветны квіток?
Дзіцячыя спектаклі таксама не адстаюць па запаўняльнасці залы: як мінімум да 7 студзеня на ўсю афішу не засталося ніводнага вольнага месца, піша Onliner.by.
Тым не менш тэатралы працягваюць дзяжурыць на сайце, каб за лічаныя секунды паспець набыць квіток, і будуюць тэорыі змовы, маўляў, ажыятаж штучны, а ўсе месцы загадзя размеркаваныя паміж «сваімі».
Пасля чарговай хвалі абурэнняў у сацыяльных сетках падрабязныя каментарыі наконт сітуацыі ў эфіры АНТ дала галоўны адміністратар тэатра Алена Казакова. Паводле яе слоў, цяпер Тэатр лялек перажывае пік папулярнасці — паказчыкі наведвальнасці выраслі як мінімум у дзесяць разоў.
— Для акцёраў гэта камплімент, для адміністрацыі — праблема. Увесь тэатр пра гэта гаворыць, мы перажываем за сітуацыю, якая склалася.
«Галодныя гульні», у якіх даводзіцца ўдзельнічаць у спробах злавіць квіток, у тэатры звязваюць найперш з невялікай колькасцю пасадачных месцаў у зале. 236 крэслаў у маштабах Мінска — гэта мала. Аднак пашыраць прастору або пераносіць пастаноўкі на іншыя пляцоўкі адміністрацыя не плануе.
«Спектаклі будуць губляць сваю мастацкую каштоўнасць», — патлумачыла Алена Казакова.
Цяпер квіткі паступаюць у продаж без папярэдняга анонсу. Усё для таго, каб сайт з імі не «лёг» яшчэ да з'яўлення месцаў у продажы. Звычайна ў так званы «дзень ікс» сайт штурмуюць больш за 20 тысяч чалавек.
Як адзначыла Казакова, продажы адкрываюцца па меры гатоўнасці тэхнічнай службы, і калі гэта адбудзецца, не ведаюць нават самі касіры і адміністратары.
— Мы прыходзім на працу як звычайна, і ў нейкі момант нам проста даюць старт.
Адзін з самых папулярных спосабаў вырашэння праблемы, які прапануюць беларусы ў сацыяльных сетках, — істотна павысіць цэны. Аднак рабіць гэтага ў тэатры пакуль не збіраюцца — «з павагі да гледачоў».
Прадаваць квіткі па пашпарце таксама пакуль немагчыма, паколькі гэта не прадугледжана заканадаўствам.
Яшчэ адно балючае пытанне — перакупшчыкі, якія прадаюць квіткі ў некалькі разоў даражэй за першапачатковы кошт. Паводле слоў Казаковай, з імі вядзецца актыўная барацьба.
— Мы звярнуліся ў ГУУС. Праводзілася праверка, ведаю, што такія людзі былі ўстаноўленыя і прыцягнутыя да адказнасці. Ёсць выказванні наконт таго, што [да перапродажу квіткоў] мае дачыненне сам тэатр. Гэта вельмі непрыемна. Мы сапраўды не маем да гэтага ніякага дачынення.