«Рэанімавалі дома 40 хвілін». Што вядома пра памерлую пасля выпіскі з радзільні 32‑гадовую блогерку з Чэрыкава
Днямі ў TikTok-акаўнце 32‑гадовай блогеркі Анастасіі Марозавай з'явіўся яе партрэт, перавязаны чорнай стужкай. Спачатку падпісчыкі — іх у дзяўчыны каля 230 тысяч — падумалі, што акаўнт узламалі.
Адны пісалі, што ў Асі новая старонка, што яна нядаўна нарадзіла дзяўчынку і пару дзён таму выпісалася з радзільні — «і ўсё з ёй добра». Іншыя запэўнівалі, што Анастасія памерла: «У яе адарваўся тромб, і гэта, на жаль, праўда». Onliner паразмаўляў з мамай і найлепшай сяброўкай Анастасіі пра тое, што адбылося. Падрабязнасці — у матэрыяле.
«Я абдымаю кожную, у каго было кесарава, дзяўчаткі»
Анастасіі Марозавай было 32 гады. Яна жыла ў невялікім горадзе Чэрыкаве ў Магілёўскай вобласці. Да першага дэкрэту працавала прадаўцом, а пасля з’яўлення TikTok стала весці блог пра сваё жыццё і здымаць кароткія ролікі.
У адным з відэа, апублікаваным 22 кастрычніка, дзяўчына распавяла пра «складаныя роды»: паводле яе слоў, «дзевяцігадзінныя схваткі скончыліся экстранным кесаравым сячэннем і рэанімацыяй». «Я абдымаю кожную, у каго было кесарава, дзяўчаткі», — напісала блогерка.
У той дзень у сям’і Анастасіі нарадзілася другая дачка — Міраслава.
6 лістапада Анастасію разам з нованароджанай дачкой выпісалі з радзільні. На старонцы блогеркі ёсць кароткі ролік, на якім яна разам з мужам выходзіць з радзільні. Праз тры дні яе не стала.
— Насця назіралася ў Чэрыкаве, але нараджаць яе адправілі ў Мінск, у РНПЦ «Маці і дзіця», — распавяла Onliner мама Анастасіі Гаянэ.
— Чаму?
— Былі паказанні. Але я не хацела б цяпер удавацца ў дэталі.
— Распавядзіце, што адбылося ў панядзелак, 9 лістапада.
— Насця яшчэ а восьмай гадзіне вечара была на нагах і пры свядомасці, а ў 21:20 ужо некалькі разоў непрытомнела, — згадвае Гаянэ. — Дома з ёй была старэйшая дачка, ёй 12 гадоў. Даведаўшыся пра тое, што здарылася, спачатку прыехаў муж, потым — родны брат. Праз дзве-тры хвіліны пасля іх прыбыла хуткая.
— Перад гэтым Анастасія на нешта скардзілася?
— Ні на што. Як кажуць, нішто не прадвяшчала бяды… Калі прыехала хуткая, Насця яшчэ была пры свядомасці, але ўжо нічога не казала. Рэанімацыю праводзілі проста ў нас дома, каля 40 хвілін яе «пампавалі», але выратаваць не змаглі.
Цела Анастасіі адправілі на ўскрыццё ў Крычаў. Паводле слоў маці, туды прыязджалі судмедэксперты з Магілёва.
— Мы толькі выйшлі са Следчага камітэта, дзе давалі паказанні (размова была ўвечары чацвярга). Я хачу ведаць праўду: чаму маё дзіця цяпер ляжыць у зямлі?
— Як вы думаеце, што магло адбыцца?
— Экспертыза будзе гатовая толькі праз месяц — тады і стануць вядомыя дакладныя прычыны. Я яшчэ не размаўляла з дактарамі з Мінска. Тое, што пісалі пра адарваны тромб, нехта прыдумаў. Пакуль нічога не зразумела.
«Абмяркоўвалі, як будзем хрысціць малышку»
За некалькі гадзін да трагедыі Насця паспела пагаварыць з найлепшай сяброўкай Кацяй. Дзяўчаты сябравалі восем гадоў.
— Нягледзячы на тое што я з Расіі, мы былі на сувязі 24/7, пакуль яна ляжала ў бальніцы. У панядзелак таксама стэлефаноўваліся і развіталіся каля пятай гадзіны вечара. Ася (так яе называла сяброўка) была шчаслівай, усміхалася. Мы будавалі планы, абмяркоўвалі, як будзем хрысціць Міраславу. Мне прапанавалі стаць яе хроснай…
— Яна распавядала, як прайшлі роды?
— Так. Казала, што яе адправілі ў «Маці і дзіця», таму што баяліся за дзіця. Падрабязнасці я б не хацела агучваць. Ася казала, што дактары рапанавалі ёй зрабіць кесарава 20 кастрычніка, але яна адмовілася. Ёй хацелася нарадзіць самой, як і першае дзіця. Яна казала: «Давайце дачакаемся, пакуль адыдуць воды». Яны адышлі 22 кастрычніка, падняўся ціск, і яна дзевяць гадзін ляжала са схваткамі (у відэа Анастасія таксама агучвала гэты прамежак часу і ланцужок падзей, за выключэннем эпізоду з падвышаным ціскам) Пасля гэтага ёй зрабілі кесарава.
— Як вы даведаліся пра смерць Насці?
— Мне паведаміла яе мама Гаянэ. Яны размаўлялі па тэлефоне, калі Асі стала блага, і мама выклікала хуткую. Пакуль тая ехала, дадому прымчаліся муж і брат. Але выратаваць Насцю не змаглі.
— У вас ёсць меркаванне, што магло адбыцца?
— Яе выпісалі ў пятніцу, а праз тры дні яна памерла. Але такога проста так быць не можа…
З Анастасіяй развіталіся ў сераду, 11 лістапада. Паводле слоў сяброўкі, на пахаванне дзяўчыны прыйшлі некалькі соцень чалавек. Некаторыя прыехалі ў Чэрыкаў нават з іншых гарадоў. Цяпер пра нованароджаную дачку Анастасіі клапоцяцца блізкія.