Зборная Беларусі па футболе прайграла Албаніі ў вырашальным матчы Лігі нацый
У намінальна хатнім паядынку ў Будапешце беларускай камандзе для першага месца патрэбная была толькі перамога, аднак падапечныя Віктара Ганчарэнкі прапусцілі два мячы без адказу. За выхад у дывізіён B яна пазмагаецца ў стыках — сярод магчымых сапернікаў ёсць Польшча.
У заключным туры групавога этапу Лігі нацый у першай групе дывізіёна C футбольная зборная Беларусі саступіла камандзе Албаніі з лікам 0:2. З такім жа лікам 0:2 беларусы прайгралі балканцам і на выездзе ў стартавым туры спаборніцтваў.
Вырашальная сустрэча праходзіла ў венгерскім Будапешце. Лік у матчы на 28‑й хвіліне адкрыў албанскі нападнік Рэй Манай, а на 57‑й хвіліне абаронца Эльсеід Гюсай падвоіў перавагу гасцей. Беларуская каманда выйшла на поле ў наступным стартавым складзе: Фёдар Лапавухаў у варотах, Кірыл Пячэнін, Ілья Лукашоў, Раман Бегуноў, Арцём Шуманскі, Аляксандр Сялява, Макс Эбонг, Герман Баркоўскі, Ілья Гоманаў, капітан Захар Волкаў і Арцём Канцавы. У другім тайме на замену таксама выходзілі Валерый Грамыка, Юрый Кавалёў, Трафім Мельнічэнка, Уладзіслаў Марозаў і Валерый Бачароў.
Па выніках шасці тураў зборная Беларусі пад кіраўніцтвам Віктара Ганчарэнкі набрала 10 ачкоў — у яе актыве тры перамогі, адна нічыя і два паражэнні ад албанцаў. Гэты вынік дазволіў камандзе фінішаваць на другім месцы ў сваім квартэце, тады як Албанія заняла першы радок і заваявала прамую пуцёўку ў дывізіён B.
Аналагічнае супрацьстаянне паміж дзвюма зборнымі ўжо адбывалася ў заключным туры Лігі нацый сезона 2020/2021 гадоў. Тады беларусы і албанцы таксама ў вочнай сустрэчы разыгрывалі першае месца ў групе, прычым перад матчам беларуская каманда мела перавагу ў два ачкі, але ў выніку саступіла з лікам 2:3.
Цяпер футбалістаў Віктара Ганчарэнкі ў сакавіку 2027 года чакаюць стыкавыя паядынкі за права падняцца ў дывізіён B супраць адной з каманд, якія занялі трэція месцы ў групах гэтай лігі. У спіс патэнцыйных сапернікаў зборнай Беларусі ўваходзяць сем нацыянальных каманд: Польшча, Грузія, Румынія, Паўночная Македонія, Ізраіль, Ірландыя і Косава. Канчатковая пара вызначыцца падчас лёсавання.