Беларуская прамысловая вытворчасць у кастрычніку знізілася
У кастрычніку ў Беларусі зноў запаволіўся рост прамысловай вытворчасці. Паводле звестак Белстата, за студзень — кастрычнік 2026 года аб’ём прамысловай вытворчасці склаў 186,8 мільярда рублёў. Гэта на 0,4% больш у супастаўных цэнах, чым за аналагічны перыяд мінулага года.
Здымак ілюстрацыйны. Фота: Lookby.media
Гэта першае зніжэнне паказчыкаў за апошнія сем месяцаў. Да гэтага Белстат штомесяц фіксаваў рост, а па выніках дзевяці месяцаў ён дасягаў 100,5%.
Найбольшы рост за дзесяць месяцаў засведчыла сфера забеспячэння электраэнергіяй, газам, парай, гарачай вадой і кандыцыянаваным паветрам — на 5,9%. Аб’ём вытворчасці ў гэтай галіне склаў амаль 15 мільярдаў рублёў. У горназдабыўной прамысловасці рост дасягнуў 2,5% (2,6 мільярда рублёў), а ў сферы водазабеспячэння, збору, апрацоўкі і выдалення адкідаў — 2% (3,56 мільярда рублёў).
Найбольш праблемным сектарам застаецца апрацоўчая прамысловасць. Яе аб’ём за гэты перыяд склаў 165,65 мільярда рублёў, а ў кастрычніку паказчык знізіўся на 0,5%.
Сярод рэгіёнаў найбольшы рост прамысловай вытворчасці зафіксаваны ў Брэсцкай вобласці — 4,4%. Станоўчая дынаміка таксама захоўваецца ў Мінскай вобласці — 3,5%, Гомельскай — 0,2% і Віцебскай — 0,1%. Апошняя далучылася да рэгіёнаў з ростам у верасні.
У астатніх рэгіёнах паказчыкі застаюцца ніжэйшымі за леташнія. У Гродзенскай вобласці яны склалі 98,5% ад узроўню мінулага года, у Магілёўскай — 97,2%, а ў Мінску — 96,2%.
Чытайце таксама:
У Светлагорску рэканструююць ЦКК, дадаўшы новыя аб'екты
У Баранавічах пачнуць шыць турэцкія джынсы
Беларускі ВУП упершыню сёлета перавысіў узровень мінулага года