У Празе на галоўным вакзале сутыкнуліся два пасажырскія цягнікі
У Празе ў выніку сутыкнення двух пасажырскіх цягнікоў на галоўным чыгуначным вакзале раніцай 17 лістапада пацярпелі не менш за 46 чалавек.
Фота: novinky.cz
Аварыя адбылася каля 7‑й гадзіны раніцы на мосце над вуліцай Сейфертавай. Абодва цягнікі рухаліся з невялікай хуткасцю, таму, паводле звестак ратавальнікаў, сур’ёзных разбурэнняў не адбылося. Пры гэтым былі пашкоджаныя пярэднія часткі абодвух саставаў.
Рух цягнікоў у напрамку раёнаў Высачаны і Лібень спынялі на дзве гадзіны. Пасля 9‑й гадзіны працу чатырох платформаў вакзала аднавілі.
Усіх пацярпелых даставілі ў бальніцы Прагі. Чацвёра з іх знаходзяцца ў цяжкім стане, астатнія атрымалі нязначныя траўмы.
Міністр транспарту Чэхіі Іван Беднаржык назваў аварыю «вельмі сур’ёзным здарэннем». Паводле яго, цяпер найважнейшае — паклапаціцца пра пацярпелых.
Прычыны і абставіны здарэння расследуе Чыгуначная інспекцыя.
Чытайце таксама:
Расійскія і лукашэнкаўскія СМІ дагэтуль не паведамілі пра руйнаванне Крымскага моста