Пуцін назваў умову ўдзелу еўрапейцаў у перамовах па Украіне
Пасля тэлефоннай размовы з прэзідэнтам Фінляндыі і прэм’ерам Нарвегіі Пуцін вырашыў пайсці далей.
Уладзімір Пуцін. Фота: Maxim Shemetov / Pool Photo via AP
Расія прапанавала прадстаўнікам Еўропы прыехаць у Маскву. Толькі пасля гэтага, паводле яго, расійскі бок вырашыць, у якім фармаце працягваць перамовы з Украінай. Пра гэта Пуцін сказаў на прэс-канферэнцыі ў Кітаі, адказваючы на пытанне пра наступны раўнд перамоў.
«Мы не супраць, але нам трэба зразумець, з чым Еўропа прыйдзе на гэтыя перамовы. І таму мы па дыпламатычных каналах прапанавалі еўрапейцам прыехаць у Маскву, каб вызначыць іх пазіцыю. А пасля гэтага мы вырашым, у якім фармаце будзем працягваць дыялог з Украінай», — заявіў ён.
Паводле Пуціна, пытанне ўдзелу Еўропы прасоўвае Вашынгтон.
«Амерыканскі бок настойліва, менавіта настойліва просіць нас пагадзіцца з удзелам еўрапейцаў у гэтых перамовах», — сказаў ён.
Адначасова Пуцін прызнаў, што абмяркоўваць бяспеку Еўропы без саміх еўрапейцаў «бессэнсоўна».
Раней еўрапейскія лідары ўжо спрабавалі аднавіць прамы дыялог з Пуціным. 27 кастрычніка прэзідэнт Фінляндыі Аляксандр Стуб і прэм’ер Нарвегіі Ёнас Гар Сцёрэ патэлефанавалі яму, каб абмеркаваць заканчэнне вайны ва Украіне. Яны падкрэслівалі, што выступаюць ад імя сваіх краін, а не ўсёй Еўропы.
Ініцыятыву сярод іншых раскрытыкавала і прэм’ерка Даніі Метэ Фрэдэрыксен. «Я вельмі скептычна стаўлюся да гэтай ініцыятывы Нарвегіі і Фінляндыі. Яна не была ўзгодненая ні з кім з нас», — заявіла яна. Фрэдэрыксен адзначыла, што не бачыць прыкмет жадання Расіі дасягнуць міру.