У Ізраілі забракавалі вэнджаную стронгу з Беларусі. У ёй знайшлі небяспечную бактэрыю
У Ізраілі адклікалі з продажу замарожанае філе вэнджанай стронгі беларускай вытворчасці кампаніі «Санта Брэмар». У прадукцыі знайшлі небяспечную бактэрыю Listeria monocytogenes, якая выклікае лістэрыёз. Пра гэта паведаміла Міністэрства аховы здароўя Ізраіля.
Бактэрыю знайшлі ў партыі прадукту «Філе стронгі салёнае, вэнджанае, нарэзанае, замарожанае» пад назвай Trout Smoked. Прадукцыя была расфасаваная ва ўпакоўкі па 100 грамаў і вырабленая 24 чэрвеня 2026 года.
Імпарцёр разам з ізраільскім Міністэрствам аховы здароўя арганізаваў яе выдаленне з гандлёвых сетак. Купцоў, якія ўжо набылі гэты тавар, заклікалі не ўжываць яго ў ежу.
Лістэрыёз — інфекцыйнае захворванне, якое перадаецца праз заражаныя прадукты, гатовыя да ўжывання без тэрмічнай апрацоўкі. Сярод іх могуць быць мяккія сыры, паштэты, вэнджаная і салёная рыба. Асаблівую небяспеку бактэрыя ўяўляе таму, што здольная выжываць і размнажацца нават пры нізкіх тэмпературах, таму замарожванне не гарантуе бяспекі прадукту.
У здаровых людзей хвароба можа працякаць адносна лёгка, выклікаючы павышэнне тэмпературы, боль у цягліцах, млоснасць і дыярэю. Аднак у цяжарных жанчын, немаўлят, пажылых людзей і людзей з аслабленым імунітэтам інфекцыя можа прывесці да сур'ёзных ускладненняў, у тым ліку сепсісу і менінгіту.
Для цяжарных заражэнне можа скончыцца выкідышам, мёртванараджэннем або цяжкім захворваннем немаўляці. Лістэрыёз лечаць антыбіётыкамі. Людзям з груп рызыкі рэкамендуюць пазбягаць непастэрызаваных малочных прадуктаў і не ўжываць астуджаныя вэнджаныя морапрадукты.
Чытайце таксама:
Беларусаў шакаваў рост цэнаў на скумбрыю, яйкі і сала. Вось што людзі кажуць
Скардзіўся на зубны боль і апынуўся ў рэанімацыі. Удава расказала пра раптоўную смерць мужа