БЕЛ Ł РУС

Пасля расійскіх удараў у Адэсе і Дняпры масавыя адключэнні святла

22.11.2026 / 21:04

Nashaniva.com

Расійскія атакі пашкодзілі энергетычную інфраструктуру Украіны. У Адэсе і прылеглых раёнах сітуацыю з электразабеспячэннем называюць вельмі складанай, у Дняпры ўвялі экстранныя адключэнні. Аварыйныя абмежаванні таксама дзейнічаюць у Запарожскай вобласці.

Людзі разводзяць вогнішчы на балконах і гатуюць сабе ежу

Паводле ўкраінскай энергетычнай кампаніі ДТЭК, расійскія ўдары сур’ёзна пашкодзілі магістральныя электрасеткі, таму перадаваць у Адэсу і навакольныя населеныя пункты дастаткова электраэнергіі цяпер немагчыма.

Рамонт працягваецца, але яго ўскладняюць пастаянныя паветраныя трывогі. Часткова ўдалося аднавіць сілкаванне крытычнай інфраструктуры.

Праз адключэнні ў частцы Адэсы няма вады, не працуе электратранспарт. З 23 па 27 лістапада ўсе школы горада пераводзяць на дыстанцыйнае навучанне праз перабоі са святлом, ацяпленнем і водазабеспячэннем.

У Дняпры і частцы Днепрапятроўскай вобласці таксама ўвялі экстранныя адключэнні — звычайныя графікі там не дзейнічаюць. 

У Запарожскай вобласці паводле тэрміновага распараджэння «Укрэнерга» ўвялі спецыяльныя аварыйныя адключэнні для стабілізацыі энергасістэмы.

Чытайце таксама:

Каментары да артыкула