Прэтэндэнт у прэзідэнты Рыжоў: Скажам Лукашэнку «Дзякуй»

Прэтэндэнт на пасаду прэзідэнта Сяргей Рыжоў, начальнік сектара знешнеэканамічнай дзейнасці ААТ «Віцебскі плодаагароднінны камбінат» лічыць, што наспела неабходнасць вырашэння многіх пытанняў, але ён «для пачатку выпусціў бы зняволеных з турмаў».

Пра гэта ён заявіў у інтэрв’ю інтэрнэт-газеце БелаПАН naviny.by.

Рыжоў гатовы выпусціць з турмы «як тых, хто сядзіць па палітычных матывах, так і тых, хто адбывае пакаранне ў першы раз». «Таму што, па-першае, краіне патрэбны людскія рэсурсы, а не сядзельцы; а па-другое, трэба вярнуць людзей іх сем’ям, што будзе крокам праяўлення гуманізму. Таксама трэба ўзяцца за разняволенне эканомікі ад кабальнай сістэмы планавання і стрымлівання. І, канешне ж, трэба вярнуць людзям іх выкрадзеныя льготы, даць ім магчымасць для рэалізацыі ўсіх іх правоў і свабод», — сказаў ён.

У сферы эканомікі ў выпадку свайго абрання прэзідэнтам Рыжоў плануе адмовіцца ад падтрымкі з бюджэту стратных прадпрыемстваў, правесці лібералізацыю цэн, надзяліць большай свабодай кіраўнікоў прадпрыемстваў.

Як беларус Рыжоў ганарыцца

«такімі момантамі і дасягненнямі ў развіцці краіны, як небывалае развіццё медыцыны, будаўніцтва дамоў і гарадоў, няхай у мінімальным плане, але распаўсюджванне сацыяльных стандартаў, аднаўленне архітэктурных помнікаў, развіццё спорту і турызму». «Так, не ўсё поўнасцю задавальняе нашым жаданням і патрэбам і ўзнікаюць сітуацыі, калі народ незадаволены. Але, азіраючыся на 16 гадоў прэзідэнцтва Лукашэнкі, нельга гаварыць, што ў гэты перыяд усё было кепска. Прэзідэнтам была праведзена велізарная работа, за якую трэба сказаць «дзякуй», — сказаў ён.

Каментары да артыкула