Група Міхалевіча: у Салігорску шмат подпісаў даў міліцыйны дом
Ініцыятыўная група Алеся Міхалевіча наведала так званы «міліцэйскі» шматпавярховік, дзе знайшла надзіва сур’ёзную падтрымку.
«Мы збіралі подпісы ў новым мікрараёне і зайшлі ў дом, дзе ў асноўным пражываюць сем’і супрацоўнікаў Салігорскага РАУС. Гэта было нечакана, але значная колькасць жыхароў гэтага дома без усялякіх комплексаў падпісалася за нашага прэтэндэнта, — расказвае мясцовы актывіст Уладзімір Шыла. — Некаторыя, праўда, казалі, што міліцыя не ўдзельнічае ў выбарах. Тады я спытаў, няўжо яны і галасаваць не пойдуць. Пытанне паставіла іх у тупік».
Павел Батуеў, які не раз затрымліваўся мясцовымі супрацоўнікамі міліцыі за ўдзел у палітычных акцыях у апошнія гады, пацвердзіў словы свайго калегі па зборы подпісаў:
«Сустрэў у гэтым доме шмат знаёмых твараў з аддзялення міліцыі. У мяне самога былі пэўныя стэрэатыпы. Слаба верылася, што будуць падпісвацца. Тым не менш, подпісы збіраліся абсалютна нармальна. Нават лепш, чым у некаторых іншых дамах», — цытуюць Батуева «Праваабаронцы за свабодныя выбары».