Міліцыя ліквідавала ў Мінску дзве порнастудыі
З пачатку 2011 года ў сталіцы ліквідаваныя дзве студыі, якія займаліся тыражаваннем парнаграфічных відэаматэрыялаў.
Першым у поле зроку аператыўнікаў упраўлення па наркакантролі і процідзеянні гандлю людзьмі ГУУС Мінгарвыканкама трапіў 53-гадовы беспрацоўны жыхар сталіцы. Як паказала праведзеная міліцыянтамі праверка, на жыццё ён зарабляў вельмі арыгінальным і прыбытковым спосабам. У прыватнасці, мужчына капіяваў прывезеныя з тэрыторыі Расійскай Федэрацыі або спампаваныя з інтэрнэту порнафільмы на чыстыя DVD-дыскі, якія пакаваў у футляры з вырабленымі ім жа адпаведнымі ўкладышамі і пасля рэалізоўваў ў коле пастаянных кліентаў альбо на рынку «Ждановічы».
Затрымалі порнапірата з доказамі злачынства падчас заключэння чарговай угоды, якая скончылася распачынаннем крымінальнай справы за распаўсюд парнаграфічных матэрыялаў. Падставаў для гэтага ў міліцыянтаў было больш чым дастаткова.
Падчас агляду кватэры ў гандляра «клубнічкай» было канфіскавана 2508 гатовых да продажу DVD-дыскаў з порнастужкамі, у тым ліку ў 40 выпадках галоўныя ролі «выконваліся» малагадовымі або непаўнагадовымі дзецьмі
(самай малодшай «акторцы» на выгляд было тры-чатыры гадкі), 852 вокладкі для чарговай партыі спецыфічнага кіно, спецыяльная кампутарная і капіявальная тэхніка, расходныя матэрыялы. Праўда, гаспадар студыі абвінавачванне ў рэалізацыі выпусканай прадукцыі не прызнаў, растлумачыўшы, што ўсю відэатэку захоўваў для асабістага прагляду. Натуральна, гэтыя словы даверу не выклікалі, бо асобныя кінастужкі мелі тыраж у 30–40 асобнікаў, што ніяк не ўпісваецца ў панятак «прыватная калекцыя».
Такім самым знаўцам забароненага відэа аказаўся і яго 36-гадовы калега, які арганізаваў у Мінску аналагічную вытворчасць, праўда, з меншым размахам. Падчас агляду кватэры ў яго было канфіскавана 1009 DVD-дыскаў парнаграфічнага зместу, чыстыя дыскі, вокладкі і неабходнае абсталяванне. На дадзены момант разглядаецца пытанне аб распачынанні ў дачыненні да арганізатара студыі крымінальнай справы.
Чытайце таксама:
Каментары да артыкула