А суд над магілёўскім журналістам У. Лапцэвічам пройдзе ў панядзелак
Разгляд адміністрацыйнай справы магілёўскага журналіста Уладзіміра Лапцэвіча адбудзецца 28 сакавіка ў судзе Ленінскага раёна горада, паведаміла БелаПАН яго жонка Наталля.
Пазаштатны карэспандэнт інфармацыйнай кампаніі БелаПАН быў затрыманы 25 сакавіка каля 17 гадзіны разам са старшынёй абласной арганізацыі Партыі БНФ Дзмітрыем Салаўёвым, з якім ён размаўляў на вуліцы. Журналіст абвінавачваецца ў дробным хуліганстве і непадпарадкаванні супрацоўніку міліцыі. Цяпер Лапцэвіч знаходзіцца ў ізалятары часовага ўтрымання.
24 сакавіка да трох сутак арышту быў прыгавораны магілёўскі журналіст Алесь Асіпцоў, абвінавачаны ў дробным хуліганстве — адпраўленні натуральных патрэб у грамадскім месцы.