Зміцер Крук: Множнасць курсаў уратуе экспарцёраў
У той жа час імпартныя тавары падаражэюць.
Эканаміст Зміцер Крук выказаў сваё разуменне рэкамендацыі Нацыянальнага банка, які фактычна ўвёў множнасць курсаў валюты ў Беларусі.
Зміцер Крук:
Нацбанк легалізаваў сітуацыю, якая цяпер утварылася на валютным рынку,калі банкі паспрабавалі пры продажы валюты на міжбанкаўскім рынку закладваць нейкія камісійныя ці дадатковыя плацяжы і курс быў насамрэч вышэйшым, чым дэкларавалася афіцыйна. Па ускосных дадзеных можна зразумець, што банкі рэзервуюць большасць валюты самі для сябе і толькі невялічкую частку для сваіх кліентаў.
«Наша Ніва»: Ці застанецца валюта на абменніках?
ЗК: Гаворка ў лісце вядзецца пра безнаяўны рынак.
Продаж у абменніках для банкаў не надта перспектыўны, але Нацбанк адміністрацыйнымі сродкамі можа прымусіць банкі прадаваць валюту.Я лічу, калі не будзе прадпрынята іншых захадаў, сітуацыя ў абменніках будзе захоўвацца на цяперашнім узроўні. Тое, што насельніцтва здае, банкі будуць прадаваць.
«НН»: Па якіх імпартных таварах перадусім ударыць стварэння паралельнага курса?
ЗК: Хутчэй за ўсё, гэта бытавая тэхніка, камп’ютары. Па іх найбольш моцна ўдарыла ранейшая пастанова Нацбанка, якія прыпыніла продаж валюты.
«НН»: А экспарцёраў пастанова ўратуе?
ЗК: У цэлым — так. Дэвальвацыя рубля для іх будзе нейкім выратаваннем, але
шмат хто з экспарцёраў будзе павінен прадаваць валюту на афіцыйным рынку і па афіцыйным курсе.Таму для розных груп экспарту будуць розныя ўмовы.