Эштан: Змякчэнне абвінавачанняў па справе аб «масавых беспарадках» не паўплывала на пазіцыю ЕС

Змякчэнне абвінавачанняў шэрагу фігурантаў па справе аб масавых беспарадках не паўплывала на пазіцыю Еўрасаюза.

«Пазіцыя Еўрасаюза з нагоды сітуацыі ў Беларусі вельмі ясная і застаецца без зменаў», — заявіла Качыянчыч.

Яна нагадала аб патрабаванні ЕС да беларускіх уладаў «аб неадкладным і безумоўным вызваленні і рэабілітацыі ўсіх, хто быў затрыманы па палітычных матывах».

Паводле яе словаў, у залежнасці ад развіцця сітуацыі ў Беларусі ЕС «гатовы разгледзець новыя адрасныя меры ва ўсіх галінах супрацоўніцтва».

Часовы павераны ў справах ЕС у Беларусі Жан-Эрык Хольцапфель 30 сакавіка сказаў БелаПАН: «Калі абвінавачанні змякчаныя, то гэта добрыя навіны». Разам з тым ён таксама запатрабаваў вызвалення і рэабілітацыі абвінавачаных па палітычных матывах.

Як паведамлялася раней, следчае ўпраўленне папярэдняга расследавання ГУУС Мінгарвыканкама 30 сакавіка змяніла абвінавачанне Сяргею Вазняку, Андрэю Дзмітрыеву, Уладзіміру Някляеву, Анастасіі Палажанцы, Віталю Рымашэўскаму і Аляксандру Фядуту. Яны абвінавачваюцца ва ўчыненні злачынства, прадугледжанага артыкулам 342 КК (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх).

Экс-кандыдаты ў прэзідэнты Уладзімір Някляеў і Віталь Рымашэўскі, давераныя асобы Някляева Аляксандр Фядута і Сяргей Вазняк, кіраўнік выбарчага штаба Някляева Андрэй Дзмітрыеў і намеснік старшыні незарэгістраванай арганізацыі «Малады фронт» Наста Палажанка з’яўляюцца фігурантамі крымінальнай справы аб масавых беспарадках у Мінску 19 снежня 2010.

Раней ім было выстаўленае абвінавачанне па частках 1 і 2 артыкула 293 КК (масавыя беспарадкі). Максімальнае пакаранне па гэтым артыкуле — 15 гадоў пазбаўлення волі.

Максімальнае пакаранне па артыкуле 342 КК — тры гады пазбаўлення волі.

Каментары да артыкула