Камароўскі: Трэба настроіцца на палітыку доўгатэрміновай падтрымкі прадэмакратычных сілаў Беларусі

Каментуючы сітуацыю ў Беларусі, прэзідэнт Польшчы Браніслаў Камароўскі заявіў, што толькі дэмакратыя і вольны рынак здольныя забяспечыць развіццё Беларусі і дабрабыт яе грамадзян.

«Трэба настроіцца на палітыку доўгага шляху падтрымкі прадэмакратычных сілаў», — падкрэсліў ён.

У панядзелак на прэс-канферэнцыі прэзідэнта Польшчы папрасілі пракаментаваць эканамічную сітуацыю ў Беларусі. Камароўскі сказаў, што беларуская тэма «надзвычай важная для Польшчы», а тое, што адбываецца ў дадзены момант ва ўсходняга суседа, звязанае з велізарным дэфіцытам дэмакратыі.

«Тое, што адбываецца ў Беларусі, пацвярджае тэзу, што немагчыма забяспечыць устойлівае эканамічнае развіццё, немагчыма забяспечыць росквіт свайго ўласнага народа ў краіне, дзе існуе такі велізарны дэфіцыт дэмакратыі»,

На яго думку, сёння беларускія ўлады ў нейкай меры плацяць за тое, што звялі Беларусь з дарогі інтэграцыі з дэмакратычным заходнім светам. «У сітуацыі з Беларуссю мы назіраем рэгрэс у дачыненні да тых магчымасцяў і намаганняў, якія былі аднолькавыя для ўсяго рэгіёну ў пачатку 90-х гадоў XX стагоддзя», — падкрэсліў прэзідэнт Польшчы.

«Толькі дэмакратыя плюс вольны рынак у стане забяспечыць развіццё Беларусі і росквіт жыхароў Беларусі», — сказаў Камароўскі.

Каментары да артыкула