На МТЗ павышаюць заробкі. На адзін месяц

На Мінскім трактарным павышаюць заробкі. Прадпрыемста ўводзіць каэфіцыент 1,1 да заробку. Але гэтае павышэнне только на адзін месяц — ліпень.

Такім чынам кіраўніцтва завода вырашыла адзначыць Дзень вызвалення Беларусі ад нямецка-фашысцкіх захопнікаў. І, напэўна, крыху збіць градус незадаволенасці заробкамі, якія праз дэвальвацыю і шалёны рост цэн з кожным днём абясцэньваюцца. Пасля таго, як у маі стыхійная акцыя пратэсту прайшла ў кавальскім і механічным цэхах прадпрыемства, адміністрацыя паабяцала перагледзець заробкі ў бок павелічэння. А Беларускі прафсаюз работнікаў аўтамабільнага і сельскагаспадарчага машынабудавання адправіў зварот у Саўмін і Нацбанк, дзе сярод іншага было патрабаванне павысіць заробкі.

Але ж вядома, што кіраўніцтва МТЗ без загаду зверху — Міністэрства прамысловасці — самастойна не можа вырашаць праблему заробкаў. І, напэўна, пакуль чыноўнікі думаюць, было прынятае рашэнне хоць на месяц, але павысіць заработную плату на прадпрыемстве.

Дарэчы, сёння на МТЗ сярэдні заробак па прадпрыемстве складае 2 млн 370 тысяч рублёў. Кіраўніцтва зарабляе ў сярэднім 3 млн 144 тысячы, рабочыя — 2 млн 380 тысяч. Самыя маленькія зарплаты ў службоўцаў — 1 млн 375 тысяч. Што да рабочых кавальскага і механічнага цэхаў, якія пратэставалі, то на сённяшні дзень яны ў сярэднім зарабляюць 2 млн 400 тысяч і 2 млн 190 тысяч адпаведна.

Каментары да артыкула