У Літве пенсійны ўзрост падымуць да 65 гадоў
Парламент Літвы прыняў 9 чэрвеня законапраект, які падымае ўзрост выхаду на пенсію да 65 гадоў,паведамляе
Такім чынам, узрост выхаду на пенсію для жанчын зраўняецца з мужчынскім. У адпаведнасці з дзейным пенсiйным заканадаўствам, жанчыны ў Літве выходзяць на пенсію ў 60 гадоў, мужчыны — у 62 з паловай.
Павялічваць пенсійны ўзрост плануецца паступова: на 4 месяцы ў год для жанчын і на 2 месяцы для мужчын. Падвышэнне пачнецца з 1 студзеня 2012 і працягнецца да таго часу, пакуль узрост выхаду на пенсію не дасягне 65 гадоў.
Падвышэнне пенсійнага ўзросту ў Літве тлумачаць фінансавымі праблемамі сістэмы дзяржаўнага страхавання. Нягледзячы на тое, што ў пенсійнай рэформы ў краіне шмат праціўнікаў, прыняты парламентам закон, хутчэй за ўсё, будзе ўхвалены прэзідэнтам. Раней Даля Грыбаўскайтэ заяўляла, што краіне неабходна прывесці пенсійны ўзрост у адпаведнасць з еўрапейскімі нормамі. У большасці краін Заходняй Еўропы ўзрост выхаду на пенсію складае ад 65 да 67 гадоў.
Рэформы з мэтай павышэння ўзросту выхаду на пенсію вымушаныя праводзіць шматлікія еўрапейскія краіны. У мінулым верасні падобная рэформа справакавала шматмільённыя дэманстрацыі ў Францыі.