Някляеў: Беларускія ўлады зноў сталі гуляць у лібералізацыю
«Гэта рашэнне — гульні спадара Лукашэнкі. Прымаючы яго, ён зыходзіў з таго, што больш выгадна».
Так пракаментаваўэкс-кандыдат у прэзідэнты Беларусі Уладзімір Някляеў рашэнне Міністэрства інфармацыі адклікаць свае іскі ў суд аб спыненні выпуску недзяржаўных газет «Наша ніва» і «Народная воля».
«Гэта рашэнне — гульні спадара Лукашэнкі. Прымаючы яго, ён зыходзіў з таго, што больш выгадна.З аднаго боку, можна забараніць газеты, у якіх ёсць стабільны пастаянны чытач, але якія ўсё ж не маюць значнага распаўсюджання і ўплыву на ўсю Беларусь. З іншага — можна нарвацца на міжнародны скандал, які б распачаўся пасля закрыцця газет. Таму было вырашана даць ім працаваць далей», — сказаў палітык.
На думку Някляева, уладам, «вядома, хацелася б газеты закрыць». «Але сітуацыя — знешняя, эканамічная, унутрыпалітычная — гэтага зрабіць не дазваляе, вымагае падпарадкавацца патрабаванням Еўрасаюза, ЗША і Расіі, каб дабрацца да мільярдаў, якія могуць выратаваць гэтую ўладу, якая ўжо ўсім надакучыла».
«Паварот да лібералізацыі як да гульні непазбежны, — мяркуе Някляеў. —
Але трэба разумець: гэты рэжым ніколі не дэмакратызуецца. Захады, якія ён вымушаны рабіць, указваюць на відавочныя прыкметы яго слабасці.Калі трэскаецца фундамент, будуць трэскацца і сцены».
Лідар Аб’яднанай грамадзянскай партыі Анатоль Лябедзька таксама лічыць, што ў сітуацыі з «Народнай воляй» і «Нашай нівай» улады паказалі сваю слабасць. «Адкліканне іскаў аб спыненні выпуску газет сведчыць пра тое, што ўлада сёння не настолькі моцная, каб раздаваць направа і налева аплявухі і пры гэтым не задумвацца аб наступствах сваіх дзеянняў», — сказаў Лябедзька ў каментарыі БелаПАН.