«Велікодныя традыцыі Пастаўскага Паазер’я» прызнаны найлепшай экскурсіяй 2011 года

Па выніках IX Рэспубліканскага турысцкага конкурсу «Спазнай Беларусь» найлепшай экскурсіяй 2011 года прызнана экскурсія «Велікодныя традыцыі Пастаўскага Паазер’я» турыстычнай арганізацыі «Цэнтр турыстычных паслуг» (Паставы).

Аб гэтым паведамляецца на сайце Міністэрства спорту і турызму.

Арганізатарамі конкурсу выступілі Міністэрства спорту і турызму і Нацыянальнае агенцтва па турызме.

У намінацыі «За ўклад у развіццё беларускага турызму» пераможцам быў прызнаны Пружанскі раённы выканаўчы камітэт; у намінацыі «За развіццё ўязнога турызму» — турысцка-экскурсійнае ўнітарнае прадпрыемства «Беларустурыст»; у намінацыі «За асабісты ўклад у развіццё турызму» — шэф-рэдактар газеты «Туризм и отдых», дырэктар выдавецтва «Рыфтур» Сяргей Плыткевіч.

У намінацыі «Найлепшы сродак размяшчэння» перамагло ААТ «Гатэль «Турыст» Бабруйска, найлепшай авіякампаніяй у сферы турызму названа беларускае прадстаўніцтва Airbaltic Corporation A/S.

Пераможцам у намінацыі «За развіццё ўнутранага турызму» прызнана прыватнае навукова-вытворчае ўнітарнае прадпрыемства «Аўтаматызаваныя тэхналогіі турызму», у намінацыі «За творчы падыход у асвятленні турызму» — спецыяльны карэспандэнт газеты «Советская Белоруссия» Віктар Корбут.

Лідарам у прасоўванні турыстычных паслуг прызнана замежнае прыватнае ўнітарнае прадпрыемства Solvex. У намінацыі «Я спазнаю Беларусь» перамагла Дар’я Праснякова, якая наведала найбольш турыстычных выдатных мясцін. Акрамя таго, спецыяльныя прызы Міністэрства культуры былі ўручаныя Асацыяцыі беларусаў у Эстоніі і турыстычнай кампаніі «Арэатур» (Лодзь, Польшча).

Сёлета конкурс сабраў больш за 100 удзельнікаў.

Каментары да артыкула