Фотакабінкі могуць з'явіцца ў Гомелі дзякуючы студэнтам

Завяршыўся абласны этап конкурсу моладзевых бізнэс-праектаў у рамках акцыі па падтрымцы моладзевага прадпрымальніцтва «Уключайся!».

Цягам кастрычніка маладыя людзі ад 18 да 31 года прадстаўлялі ў аргкамітэт свае праекты па трох намінацыях: сфера паслуг (у тым ліку турыстычны бізнэс і аздараўленне, IT-тэхналогіі, рэкламны бізнэс і інш), вытворчая сфера, а таксама інавацыйнае прадпрыемства і сфера навукова-адукацыйнага развіцця, піша «Новы Вячэрні Гомель».

Свае работы студэнты БелДУТ прадставілі журы — буйным бізнэсоўцам горада. Адна з груп прапануе стварыць кадравае агенцтва «Лайк», якое будзе займацца працаўладкаваннем студэнтаў, стварэннем баз дадзеных вакансій, пошукам месцаў для работнікаў без кваліфікацыі. На ўсё гэта заснавальнікам агенцтва спатрэбіцца тры чалавекі ў штаце і 28,5 мільёнаў рублёў першапачатковага капіталу.

Яшчэ студэнты прапануюць заняцца вытворчасцю экалагічна чыстых сумак. Аўтар бізнэс-праекта запэўнівае, што сумкі, падобныя да твораў вядучых сусветных дызайнераў, разыдуцца на ўра. Да вытворчасці сумак будуць прыцягваць хатнюю працу неабароненых слаёў насельніцтва і тым самым забяспечваць ім дадатковы заробак.

Але самым цікавым праектам для прысутных стала прапанова па ўсталяванні ў Гомелі фотакабінак. Ідэя ў свеце не новая, але ў Беларусі рэалізацыяй такога віду паслуг ніхто не займаўся.

Пераможцы рэспубліканскага фіналу ў кожнай намінацыі стануць уладальнікамі мэтавых грашовых грантаў у памеры 10 мільёнаў рублёў. Будучыя гомельскія бізнэсоўцы дамовіліся, што ў выпадку выйгрышу і рэалізацыі праекта любы з іх аддасць 7% прыбытку на дабрачыннасць.

Каментары да артыкула