Невядомыя пагражаюць зьнішчыць бацькоў вядомага сацыёляга Вардамацкага
8 лютага пасьля выступленьня дасьледчыка ў Брусэлі з дакладам па Беларусі яго 80‑гадовая маці атрымала ананімныя тэлефанаваньні з пагрозамі.
8 лютага пасьля выступленьня дасьледчыка ў Брусэлі з дакладам па Беларусі яго 80‑гадовая маці атрымала ананімныя тэлефанаваньні з пагрозамі.
Паводле маці Андрэя Вардамацкага, «дзіўны голас» заявіў, што «заўтра раніцай вы будзеце зьнішчаны». Празь некаторы час тэлефанаваньне паўтарылася. Жанчына паведаміла пра пагрозы ўчастковаму міліцыянэру і суседзям.
Сацыёляг спадзяецца, што гаворка ідзе ўсё ж пра псыхалягічны ціск, а не рэальную фізычную расправу. Маці Вардамацкага пакутуе на павышаны ціск.
Даклад, які прагучаў у рамках слуханьняў Эўрапарлямэнту па Беларусі, прысьвечаны прадстаўленьню жыхароў Беларусі аб Эўразьвязе. Згодна з сацыялягічным апытаньнем 19,3% беларусаў ведаюць пра новую стратэгію ЭЗ у дачыненьні да краіны. Гэтая стратэгія была агучаная ў лістападзе 2006 года. Паводле Вардамацкага, асноўная думка дакладу магла чытацца як заклік Эўразьвязу да дзеяньня.
Фота Юліі Дарашкевіч