У Польшчы 2012-ы абвешчаны Годам педагога Януша Корчака
2012 год у Польшчы абвешчаны Годам Януша Корчака, педагога, лекара, пісьменніка, абаронцы правоў дзяцей.
Помнік Янушу Корчаку ў Ерусаліме.
Сапраўднае імя Корчака – Генрык Голдшміт. Ён нарадзіўся ў 1878 годзе ў Варшаве ў яўрэйскай сям’і.
У 2012 годзе адзначаюцца дзве важныя гадавіны, звязаныя з постацю Януша Корчака – 70-ая гадавіна смерці ў лягеры смерці ў Трэблінцы і 100-я гадавіна адкрыцця Корчакам Дзіцячага дому ў Варшаве. Дом для яўрэйскіх сірот праіснаваў у сталіцы Польшчы да 1942 г.
Рашэнне пра ўганараванне ягоным імем 2012 года прыняў Сэйм Польшчы. У адпаведнай пастанове напісана, што
“Януш Корчак разглядаў дзяцей ня толькі як аб’ект клопату з боку дарослых. Ён папулярызаваў і рэалізаваў на практыцы ідэю павагі правоў і інтарэсаў дзяцей, іх самастанаўлення”.
За вернасць сваім поглядам ён заплаціў уласным жыццём. Разам са сваімі выхаванцамі ён загінуў у газавай камеры нямецкага лягеру смерці ў Трэблінцы.