Ксяндза палохаюць за актыўнасць у пілігрымках
Дэпартамент фінансавых расследаванняў пачаў праверку дзейнасці святара Вячаслава Барка з парафіі ў Расонах.
Падставай паслужыў «ананімны данос».
«Павіншуйце мяне! Маёй святарскай дзейнасцю ў Расонах зацікавіліся. Ананім напісаў скаргу (у фінасавую міліцыю, пракуратуру і Адміністрацыю прэзідэнта), абвінавачваючы мяне ў тым, што я езджу па касцёлах і ва ўсіх (католікаў і праваслаўных) збіраю грошы, і няма каму абараніць ад мяне грамадзян Беларусі; а ад пілігрымак, падлічыў той самы ананім, я паклаў сабе ў кішэнь ад 350 тысяч еўра, бадай, аж да мільёна. Фінансавая міліцыя вядзе разбіральніцтва!» — піша на сваёй старонцы ў Facebook Вячаслаў Барок.
Там жа святар адзначае, што дзейнасць па арганізацыі пілігрымак была ўхваленая кіраўніцтвам беларускага Касцёла і мае адпаведныя дэкрэты. Са словаў айца Вячаслава, праваахоўныя органы не цікавіць аўтар ананімкі, і яны не спрабуюць высветліць яго асобу.
Падрабязна пазнаёміцца з пілігрымкамі, якія арганізуе ксёндз Вячаслаў Барок, можна на сайце piligrymka.by.