Януковіч хоча зрабіць расійскую мову другой дзяржаўнай
Прэзідэнт Украіны спасылаецца на досвед некаторых еўрапейскіх дзяржаваў.
Украіна ў найбліжэйшы час прыме закон аб дзвюх дзяржаўных мовах — украінскай і расійскай. Аб гэтым заявіў прэзідэнт Украіны Віктар Януковіч у інтэрв’юІТАР-ТАСС .
«У гэтым зацікаўлена Украіна, у гэтым зацікаўленыя людзі, у гэтым зацікаўлена насельніцтва, якое размаўляе ў асноўным на дзвюх мовах», — сказаў ён.
Януковіч таксама адзначыў, што «былі перыяды ў дзяржаве, калі дапускаліся перакосы ў моўных праблемах», аднак цяпер гэтай праблемы ва Украіне не існуе і "трэба гэтае пытанне адрэгуляваць на заканадаўчым узроўні».
Януковіч таксама прывёў у прыклад сусветную практыку: «шматлікія еўрапейскія краіны маюць дзвюхмоўе, тры мовы дзяржаўныя і жывуць нармальна, спакойна».
Нагадаем, Януковіч да абрання прэзідэнтам Украіны раней таксама заяўляў аб магчымасці надання расійскай мове статусу другой дзяржаўнай.