У Кобрынскім раёне праваліліся пад лёд і патанулі два школьнікі
Як паведамілі ў Кобрынскім раённым аддзеле Следчага камітэта, трагедыя здарылася 16 сакавіка прыблізна ў 19.00 на штучным вадаёме ў вёсцы Бельск. Паводле папярэдніх звестак, два мясцовыя школьнікі, 10 і 11 гадоў, каталіся на лёдзе, пакуль той пад імі не праламаўся. Мясцовы жыхар, які праходзіў непадалёк, пачуў крыкі хлопчыкаў, калі тыя ўжо знікалі пад вадой. Дзеці знаходзіліся за сем метраў ад берагу, і выратаваць іх мужчына не здолеў. Целы хлопчыкаў дасталі вадалазы раніцай 17 сакавіка.
Праверку па факце гібелі школьнікаў праводзіць Кобрынскі раённы аддзел Следчага камітэта. Папярэдняя прычына смерці дзяцей — асфіксія ў выніку ўтаплення.
Паводле звестак Брэсцкага абласнога савета Асвода, з пачатку гэтага года ў вадаёмах вобласці патанулі шэсць чалавек, дзевяць удалося выратаваць.