На мінскім мясакамбінаце 6 чалавек атруціліся аміякам
На прадпрыемстве адбылася ўцечка 50 кілаграмаў аміяку.
Шасцёра работнікаў КУП "Мінскі мясакамбінат" дастаўлены ў гарадскую клінічную бальніцу хуткай дапамогі з-за атручэння парамі аміяку.
Як паведамляецца на афіцыйным сайце МНС, інфармацыя аб атручэнні парамі аміяку работнікаў Мінскага мясакамбіната па вуліцы Казінца, 46, паступіла ў цэнтр аператыўнага ўпраўлення пры Мінскім гарадскім упраўленні МНС 5 красавіка ў 22.15.
На месцы НЗ ратавальнікі ўстанавілі, што ў будынку цэху паўфабрыкатаў адбыўся выхад аміяку з радыятара ахаладжэння ў халадзільнай камеры, што на чацвёртым паверсе будынка. У выніку адбылася ўцечка каля 0,05 тон аміяку (агульная колькасць аміяку ў сістэме складае 20 тон).
На момант здарэння ў цэху працавалі 90 чалавек, яны самастойна пакінулі будынак. Разам з тым шасцёра чалавек звярнуліся па медыцынскую дапамогу.Пасля абследавання брыгадамі хуткай медыцынскай дапамогі іх шпіталізавалі ў бальніцу з дыягназам "інгаляцыйнае атручэнне парамі аміяку лёгкай ступені".
Сіламі аварыйна-тэхнічнага звяна КУП "Мінскі мясакамбінат" была перакрыта падача аміяку ад лінейных рэсівераў да халадзільнай камеры, тым самым пагроза далейшага выхаду аміяку з сістэмы была ліквідавана. Работнікі МНС зрабілі замер канцэнтрацыі пароў аміяку на прадпрыемстве, правялі мерапрыемствы па іх асаджэнні і прадухіленні распаўсюджання.
Як сцвярджаюць у МНС,
небяспечнае рэчыва не выйшла за межы чацвёртага паверха: на ніжніх паверхах, у сумежных цэхах і на вуліцы небяспекі для жыцця і здароўя людзей няма.
Прычыны высвятляюцца.
Гэта не адзінае НЗ на Мінскім мясакамбінаце за апошнія суткі, зазначаюць у МНС. Днём у чацвер атручэнне парамі аміяку атрымаў таксама работнік кампрэсарнага цэху прадпрыемства. Гэта адбылося пры выпрабаванні абсталявання. Мужчына таксама шпіталізаваны ва ўстанову аховы здароўя.
Анастасія Янушэўская, БелаПАН.