У Віцебску міліцыя спынілі флэш-моб бясплатных абдымкаў
Акцыя каля гарадской ратушы працягвалася каля 40 хвілін.
У чацвер 19 красавіка ў Віцебску міліцыя спыніла флэш-моб «Free Hugs» — вольныя ці бясплатныя абдымкі. Пра гэта «НН» паведаміў чытач. Па яго словах, акцыя адбывалася каля Ратушы, працягвалася каля 40 хвілін, калі з’явіліся супрацоўнікі міліцыі і спынілі яе.
«Гэта было камічна і сумбурна. Цяпер не толькі апладзіраваць нельга, але і абдымацца».
«Free Hugs» папулярныя ва ўсім свеце. Гэта рух людзей, якія на вуліцах прапануюць абдымкі выпадковым мінакам. Заснаваны аўстралійцам Хуанам Манам у 2004 годзе. Папулярнасць ягоная выйшла за межы Аўстраліі праз два гады, калі выйшаў кліп мясцовага гурту «Sick Puppies».
Ёсць свае прыхільнікі вольных абдымкаў і ў Беларусі. У тым жа Віцебску «Free Hugs» ладзяцца не першы год.
Беларуская міліцыя рэгулярна разганяе падобныя флэш-мобы. У студзені 2010 года ў Брэсце міліцыя не дала правясці акцыю і склала на шэраг яе ўдзельнікаў пратаколы. У жніўні 2011-га адзначылася барысаўская міліцыя.
«Sick Puppies» — Free Hugs Campaign