Лукашэнка: Некаторыя замежныя банкі вядуць сябе як замежныя агенты
Ён звінаваціў іх у эканамічным шпіянажы.
Праца замежных банкаў у Беларусі абмяркоўвалася 23 ліпеня ў ходзе даклада кіраўніка Нацыянальнага банка Надзеі Ермаковай Аляксандру Лукашэнку.
Лукашэнка нагадаў, што раней даручаў звярнуць увагу на дзейнасць у Беларусі даччыных прадпрыемстваў і філіялаў замежных банкаў.
«Як працуюць замежныя банкі, якое ваша меркаванне? — задаў пытанне Лукашэнка. — Бо мне паступала інфармацыя, што некаторыя замежныя банкі сябе вядуць проста як замежныя агенты ў поўным сэнсе гэтага слова.І ўжо прадпрымальнікі крыўдзіліся на тое, што фінансавая дакументацыя вельмі шматлікіх кампаній капіюецца і адпраўляецца некаторых заказчыкам. Я правяраў. Гэта сапраўды пацвярджаецца. Таму ў свой час я вас прасіў звярнуць на гэта ўвагу.
Якія меры неабходна прыняць, можа быць, трэба і маё ўмяшанне ў гэтым плане?».
Аляксандр Лукашэнка звярнуў увагу на тое, што калі замежныя банкі прыйшлі ў беларускую эканоміку, то павінны на яе працаваць, а не проста ўдзельнічаць у цікавых для сябе праектах. «Банкі, якія прыйшлі з замежным капіталам, у асноўным расійскім, на нашым рынку працуюць, крэдытуюць эканоміку», — адзначыла Надзея Ермакова.
Варта адзначыць, што інфармацыя аб выцеках дакументацыі з банкаў з замежным капіталам не праходзіла. Не да канца ясна, што мае на ўвазе Аляксандр Лукашэнка і якія банкі падазрае.