Мінюст прадпісаў Партыі БНФ «выправіцца»

Міністэрства юстыцыі прадпісала Партыі БНФ устараніць парушэнні заканадаўства і статута партыі.

Як паведамляе прэс-служба Партыі БНФ, да іх паступіў ліст Мінюста пад назвай «Аб парушэннях патрабаванняў заканадаўства і статута» за подпісам намесніка міністра юстыцыі Ігара Тушынскага. У ім пералічваюцца парушэнні, якія, на думку Мінюста, былі дапушчаны партыяй у арганізацыі справаводства, уліку членаў, афармлення бланкаў для афіцыйнай перапіскі, выкарыстання партыйнай сімволікі. Мінюст адзначае, што гэтыя парушэнні носяць грубы характар і могуць стаць падставай для вынясення Партыі БНФ пісьмовага папярэджання.

У лісце таксама прапануецца на працягу месяца ўстараніць недахопы ў дзейнасці, прыняўшы адпаведныя рашэнні партыйных органаў.

Кіраўнік Партыі БНФ Аляксей Янукевіч звязвае ўвагу Мінюста з актыўнасцю, якую разгарнулі рэгіянальныя структуры партыі ў рамках парламенцкай выбарчай кампаніі.

«Безумоўна, увага кантрольных органаў выклікана тым, што партыя ў ходзе выбарчай кампаніі актывізавала сваю дзейнасць. Мы ў адпаведнасці з патрабаваннямі заканадаўства паведамілі ў Міністэрства юстыцыі аб скліканні пазачарговага з’езда Партыі БНФ па вылучэнні кандыдатаў у дэпутаты, які пройдзе 4 жніўня. І адразу ж пасля гэтага быў атрыманы гэты ліст з заўвагамі да бланкаў і ўліку членаў. Не выключана, што такім чынам можа рыхтавацца глеба для таго, каб паставіць пад сумненне партыйнае вылучэнне нашых кандыдатаў», — сказаў Янукевіч.

Ён адзначыў, што па большасці са спрэчных заўваг Мінюсту раней ужо былі дадзены тлумачэнні.

«Мы прыкладзем усе намаганні да таго, каб не даць падстаў аспрэчваць рашэнні з’езда па вылучэнні кандыдатаў у дэпутаты», — заявіў Янукевіч.

Каментары да артыкула