У Мінск прыбывае тэхнічная місія Сусветнага банка

13 жніўня ў другой палове дня ў Беларусь прыбывае місія Сусветнага банка на чале з дырэктарам аддзела Украіны, Беларусі і Малдовы СБ Чымяа Фанам.

Як паведамілі ў беларускім прадстаўніцтве СБ, гэта тэхнічны візіт, падчас якога будзе абмяркоўвацца ход рэалізацыі праектаў, што фінансуюцца банкам, у сферы энергаэфектыўнасці і водазабеспячэння.

Місія будзе працаваць у Беларусі да 16 жніўня ўключна. Запланаваныя сустрэчы экспертаў СБ у Савеце міністраў, у тым ліку з першым віцэ-прэм’ерам Уладзімірам Сямашкам,

***

Як паведамлялася раней, у ліпені прэм’ер-міністр Беларусі Міхаіл Мясніковіч прапанаваў СБ паскорыць падрыхтоўку новай краінавай стратэгіі банка па Беларусі. Папярэдняя чатырохгадовая стратэгія завяршылася ў сярэдзіне 2011 года, аб’ём фінансавання па ёй склаў 400 мільёнаў долараў.

У канцы ліпеня СБ пацвердзіў намер аказваць падтрымку Беларусі ў правядзенні структурных рэформ.

«Сусветны банк гатовы працягваць аказанне дапамогі ўраду ў распрацоўцы і рэалізацыі комплексных і глыбокіх структурных рэформ, для таго каб спрыяць умацаванню канкурэнтаздольнасці і ўстойліваму росту ў Рэспубліцы Беларусь», — гаварылася ў лісце Чымяа Фана прэм’ер-міністру Беларусі Міхаілу Мясніковічу.

У працяг працы, распачатай у межах Краінавага эканамічнага мемарандуму, СБ запланаваў праграмную тэхнічную дапамогу па пытаннях структурных рэформ, паведамлялася ў лісце.

СБ таксама пацвердзіў гатоўнасць аказваць дапамогу Нацыянальнаму агенцтву па інвестыцыях і прыватызацыі «ў рэалізацыі праграмы прыватызацыі васьмі канкрэтных сярэдніх прадпрыемстваў, каб прадэманстраваць перавагі канкурэнтных і адкрытых працэдур прыватызацыі».

У бюджэтна-падатковай сферы СБ прапаноўваюць тэхнічную дапамогу ў пытаннях рэфармавання пенсійнай сістэмы і сістэмы сацыяльнай дапамогі, павышэння эфектыўнасці дзяржаўных расходаў на ахову здароўя і адукацыю, удасканалення міжбюджэтных адносінаў і кіравання доўгам.

Асаблівая ўвага ў лісце надавалася далучэнню Беларусі да Сусветнай гандлёвай арганізацыі. На думку Чымяа Фана, далучэнне да СГА «ўяўляе сабой унікальную магчымасць звязаць рэформы са знешнімі фактарамі». СБ пацвердзіў гатоўнасць аказаць беларускаму ўраду «падтрымку ў гэтым важным працэсе».

Каментары да артыкула