Мясніковіч заклікаў бізнес-супольнасць змагацца з «шэрым сектарам»

Прэм’ер-міністр Беларусі Міхаіл Мясніковіч на цырымоніі ўручэння прэміі «Лепшы прадпрымальнік 2011 года» 19 верасня ў Мінску заклікаў бізнес-супольнасць змагацца з «шэрым сектарам» у прадпрымальніцтве.

Сёння, на думку кіраўніка ўрада, «узровень сацыяльнай адказнасці і празрыстасці ў бізнес-асяроддзі жадае лепшага». «Няхай гэта не носіць масавага характару, але ўтойванне выручкі, сыход ад падаткаў, злоўжыванні і адкрытыя махінацыі — гэта ўласціва тым, хто асабістую нажыву ставіць вышэй за ўсё», — зазначыў кіраўнік урада.

Роля бізнес-саюзаў у барацьбе з гэтымі негатыўнымі з’явамі сёння мінімальная, падкрэсліў ён. «Але ж менавіта яны павінны ствараць узровень прафесійнай этыкі і сацыяльнай адказнасці бізнесу ў краіне. Прапаноў па гэтым пытанні, якое хвалюе ўсё грамадства, ва ўрадзе яшчэ не атрымалі», — паведаміў Мясніковіч.

На яго думку, «у шэрым сектары знаходзіцца немалая частка тых, чые інтарэсы адстойваюць бізнес-саюзы». «Я прасіў бы вельмі сур’ёзна заняцца гэтым пытаннем», — заклікаў ён.

Мясніковіч мяркуе, што ўнёсак бізнесу ў ВУП у краіне моцна заніжаны. «Прыватнік не заўсёды падае поўную дэкларацыю аб выкананых работах і выкананых паслугах. Гэта не толькі недабор ВУП або фонду сацыяльнай абароны насельніцтва і бюджэту. Гэта скажэнне эканамічных адносінаў за кошт няўлічанага грашовага абарачэння, спекулятыўных аперацый, тое, што перашкаджае ўраду прымаць правільныя і ўзважаныя кіраўніцкія рашэнні», — падкрэсліў прэм’ер-міністр.

«Пакуль такая практыка не будзе адвяргацца ўсёй бізнес-супольнасцю, гаварыць аб развіцці культуры прадпрымальніцтва ў нашай краіне бесперспектыўна. Беларусам уласціва вельмі моцнае пачуццё справядлівасці і праўдалюбства.

Мясніковіч падкрэсліў, што толькі сацыяльна адказныя бізнес-мадэлі могуць разлічваць на падтрымку дзяржавы. «Свабода прадпрымальніцтва ў нас заўсёды будзе ўвязана са збалансаванымі інтарэсамі асобы, грамадства і дзяржавы», — канстатаваў кіраўнік урада.

Каментары да артыкула