Лаўрэата Нобелеўскай прэміі міру назавуць сёння. Ці атрымае яе Алесь Бяляцкі?
Пераможцу абяруць нарвежцы.
Лаўрэата прэміі міру вызначае Нобелеўскі камітэт у Осла на чале з генеральным сакратаром Рады Еўропы, былым прэм’ерам Нарвегіі Торб’ернам Ягландам.
Пяць чальцоў камітэта абіраюцца нарвежскім парламеэнтам і звычайна рэпрэзентуюць увесь палітычны спектр.
Сёлетняга лаўрэата Нобелеўскай прэміі міру выберуць з 231 намінанта — 188 чалавек і 43 арганізацыяў. Сярод намінаваных на атрыманне прэміі – асуджаны на чатыры з паловаю гады зняволення беларускі праваабаронца, кіраўнік зачыненага цэнтра «Вясна» Алесь Бяляцкі.
Апрача Бяляцкага, у ліку фаварытаў фігуруюць амерыканскі палітолаг і ідэолаг негвалтоўнага змагання з дыктатарскімі рэжымамі Джын Шарп, апазіцыйная кубінская блогерка Яані Санчэс, расійская праваабаронца Святлана Ганнушкіна і піянер барацьбы за правы чалавека ў Афганістане Сіма Самар.
Сёлета з прычыны крызісу Нобелеўская прэмія міру складае 8 мільёнаў замест ранейшых 10 мільёнаў шведскіх крон (931 тысяча замест 1 мільёна 200 тысяч еўра).